राष्ट्रिय सभाकी सांसद् विमला राई पौड्यालले बलात्कार मुद्दामा हदम्यादसम्बन्धी व्यवस्था हटाउने कानून ल्याउन माग गरेकी छिन् ।

तीन दिन या ५ दिनमा पास गर्नेगरी संसद्मा विधेयक ल्याउन उनले गृहमन्त्री बालकृष्ण खाँणलाई आग्रह गरेकी हुन् ।

सोमवार बसेको राष्ट्रिय सभा बैठकको विशेष समयमा सांसद पौड्यालले बलात्कार मुद्दामा हदम्याद हटाउने कानून ल्याउन सरकारलाई रुलिङ गर्न माग गरिन् ।

‘प्रतिनिधि सभाको महिला बालबालिका समितिको बैठकमा भएको छलफल गृहमन्त्रीलाई सुनाउँदैछु, महिला हिंसा र नाबालिकको बलात्कारको हकमा हदम्याद हटाइयोस्, यो हटाउनुपर्छ,’ पौड्यालले भनिन् । 

कुनै ठूलो दल फुटाउन सरकारले अध्यादेश ल्याए पनि यस्तो संवेदनशील विषयमा कानून ल्याउन नसकेको भन्दै उनले आपत्ति जनाइन् ।

‘महिला हिंसाको अन्त्य गर्न, किशोरीलाई बचाउन ५ दिनमा पास गर्नेगरी कानून ल्याउनुस्, यसमा अध्यक्षले रुलिङ गर्नुस् भनेर माग गर्न चाहन्छु,’ उनले भनिन् ।

 ‘सेलिब्रेटीलाई पनि कारवाही गर्नुपर्छ’

राष्ट्रपतिबाट मनोनित सांसद पौड्यालले बलात्कारको घटना लुकाउन सघाउनेलाई पनि मतियारको रूपमा कारवाही हुने कानूनी व्यवस्था रहेको भन्दै सेलिब्रेटी भएपनि कारवाही गर्नुपर्ने बताइन् ।

‘यो केसले उब्जाएको अर्को प्रश्न, यो देशको चर्चित महिलालाई पनि सुनाएकी थिइन्, त्यहाँ उनको सुनुवाइ भएन । हाम्रो कानूनले बलात्कारको केसमा त्यसलाई लुकाउने, छिपाउने र कानूनी उपचारमा जान रोक्नेलाई अपराधी मान्छ, मतियार मान्छ । यो केसमा जे जति मानिसले थाहा पाएका छन्, उनीहरूले किन कानूनलाई मानेनन् ? सबैलाई बकाउनुपर्छ, सबैलाई सजाय गर्नुपर्छ । देशका सेलिब्रेटी हुन कि केटा साथी हुन्,’ उनले भनिन्, ‘यो केसमा हामीले पीडितलाई न्याय दिलाउन सकेनौं भने हाम्रा छोरीहरूले न्याय पाउँदैनन् । अनि हामी सांसद मन्त्री भनेर बस्नुको कुनै अर्थ रहँदैन ।’

पीडित युवतीले एक पूर्व मिस नेपाललाई आफूले घटनाबारे बताएको, तर सहयोग नपाएको गुनासो गरेकी थिइन् ।