सरकारले आगामी आर्थिक वर्ष २०७९/८० को नीति तथा कार्यक्रम पारित गरेको छ । प्रधानमन्त्री निवास बालुवाटारमा बसेको मन्त्रिपरिषद्को बैठकले नीति तथा कार्यक्रम पारित गरेको बैठकमा सहभागी एक मन्त्रीले जानकारी दिए । 

‘नीति तथा कार्यक्रम मन्त्रिपरिषद्को बैठकबाट पारित भएको छ । दिउँसो ४ बजे बस्ने संसद् बैठकमा नीति तथा कार्यक्रम पेश हुन्छ,’ मन्त्रीले लोकान्तरसँग भने । 

मंगलवार दिउँसो ४ बजे बस्ने संयुक्त सदनको बैठकलाई सम्बोधन गर्दै राष्ट्रपति विद्यादेवी भण्डारीले सरकारको नीति तथा कार्यक्रम प्रस्तुत गर्ने कार्यक्रम रहेको छ । 

नीति तथा कार्यक्रममा सरकारले नेपाली अर्थतन्त्रलाई आत्मनिर्भर बनाउने, नयाँ उद्योग कलकारखाना खोल्नेलगायतका कार्यक्रम समावेश गरेको बताइएको छ । 

संवैधानिक व्यवस्थाअनुसार जेठ १५ गते आगामी आर्थिक वर्षको बजेट ल्याउनुपर्छ । त्यसअघि सरकारले आगामी आर्थिक वर्षको नीति तथा कार्यक्रम सार्वजनिक गर्छ । सोही कार्यक्रमको आधारमा बजेट आउँछ ।