मकवानपुरको हेटौंडामा जारी चौथो संस्करणको स्थानीय तह शहीद स्मृति मकवानपुर गोल्डकप प्रतियोगिताको उपाधि विभागीय टिम त्रिभुवन आर्मीले जितेको छ । आज हेटौंडा–५ स्थित पिप्ले–क्याम्पा रंगशालामा भएको फाइनल खेलमा घरेलु टोली एफसी विजय युथलाई २–१ गोल अन्तरले पराजित गर्दै दोस्रो पटक लगातार गोल्डकपको ट्रफी आफ्नो पोल्टामा पार्न सफल भएको हो । 

निकै प्रतिस्पर्धात्मक भएको खेलको सुरुवाती १४ औं मिनेटमा आर्मीका टेक बहादुर बुढाथोकीको पासमा आर्मीका कप्तान भरत खवासले १ गोल गर्दै टिमको लागी अग्रता लिए । तर त्यो अग्रता धेरै समय भने टिक्न सकेन । आर्मीका डिफेन्डर योग्ध शाहीले डिबक्स भित्र विजय युथका विमल रानालाई फल गर्न पुग्दा विजय युथले पेनाल्टीको अवसर प्राप्त गर्यो । उक्त पाएको पेनाल्टीलार्ई डोना थापाले २५ औं मिनेटमा गोल गर्दै परिणत गर्दै खेल पुग्न बराबरीमा आयो । खेलको निर्धारित समयको पहिलो  हाफमा समान गोलको अवसर प्राप्त गरे पनि थप गोल हुन सकेन । त्यस्तै खेलको दोस्रो हाफको सुरुवाती ५ औ मिनेटमा कमलबहादुर थापाले डिबक्स बाहिरबाट गरेको प्रहार सोझै गोलमा परिणत हुँदा आर्मी २–१ गोल अन्तरले  अगाडी रह्यो । भने खेलको ५५ औं मिनेटमा विजय युथका कप्तान अशोक बरालले डिबक्स भित्र विपक्षी टिमका खेलाडी सन्तोष केसीलाई लडाउँदा आर्मीले पेनाल्टीको अवसर पायो ।

तर दिनेश हेन्जनले हानेको पेनाल्टी बल  पोष्ट बार माथिबाट जाँदा थप गोल हुन सकेन । त्यो संगै खेलको निर्धारित समयमा थप गोल विजय युथले गर्न नसक्दा साविक विजेता समेत रहेको विभागीय टिम त्रिभुवन आर्मीले पुग्न दोस्रो पटक उपाधि जित्दा साविक उपविजेता रहेको विजय युथ पुग्न हार व्यहोर्न बाध्य हुन पुग्यो । यो संगै उपाधि विजेता टिम त्रिभुवन आर्मीले नगद १५ लाख रूपैयाँसहित शिल्ड, मेडल र प्रमाणपत्र  गर्यो भने उपविजेता  विजय युथले नगद १० लाख रुपैयाँ सहित शिल्ड, मेडल र प्रमाणपत्र गर्यो ।

त्यस्तै  प्रतियोगिताको विधागत उत्कृष्ट खेलाडी आर्मीका गोलरक्षक विकेश कुथु, डिफेन्डर विमल पाण्डे, मिडफिल्डर विवेक बस्नेत, फरवार्ड दिनेश हेन्जन घोषित भए । उनीहरुले जनही नगद २५ हजार रुपैया सहित ट्रफी र प्रमाणपत्र प्राप्त गरे । त्यस्तै उत्कृष्ट प्रशिक्षक तर्फ आर्मीका नवीन न्यौपाने घोषित भए उनले पनि २५ हजार रुपैयाँसहित ट्रफी र प्रमाणपत्र प्राप्त  गर्दा विजय युथको तर्फबाट भने प्रतियोगिताकै सर्वोत्कृष्ट खेलाडी अशोक बराल घोषित भए । बरालले रोयल इनफिल्ड बाइक प्राप्त गरे । जेठ १९ गतेबाट जारी प्रतियोगितामा क्यामरुनी क्लब एभिनियर एफसीसहित राष्ट्रियस्तरका १२ क्लबहरूको सहभागिता थियो ।