अमेरिकी सैन्य गठबन्धनमा नेपाल सहभागी हुन लागेको हो ? संसदमा सरकारको जवाफ

परराष्ट्रमन्त्री नारायण खड्काले राष्ट्रहितविपरीत सरकारले कुनै सैन्य गठबन्धनमा जाने सम्झौता नगर्ने बताएका छन् । 

चर्चामा रहेको अमेरिकी स्टेट पार्टनरसिप प्रोग्राम (एसपीपी) भने मानवीय र प्राकृतिक प्रकोप नियन्त्रणसम्बन्धी कार्यक्रम रहेको उनले दाबी गरे । 

प्रतिनिधि सभामा विनियोजन विधेयकमाथिको प्रश्नको जवाफपछि सांसदले राखेका पूरक प्रश्नको जवाफमा मन्त्री खड्काले स्वाभिमानी सरकारले कुनै सैन्य गठबन्धनमा जाने निर्णय नगर्ने बताएका हुन् । 

‘अमेरिकी सेनाका जर्नेलको हालैको नेपाल भ्रमणपछि नेपाललाई सैन्य गठबन्धनमा लैजाने हो कि भन्ने आशंका गरेको देखियो । अमेरिकाको स्टेट पार्टनरसिप प्रोगाम मानवीय सहयोग, प्राकृतिक प्रकोपबाट उद्धार गर्ने कार्यक्रम हो । यो कुनै सन्धि होइन, अस्थायी खालको कन्सेप्ट हो । सैन्य अलाइन्स होइन, पार्टनरसिप प्रोग्राम हो,’ मन्त्री खड्काले भने । 

मन्त्री खड्काले नेपाल सैन्य गठबन्धनमा फस्न लाग्यो भन्ने कुरा सत्य नभएको बताए । ‘कांग्रेस नेतृत्वको सरकार त्यतिकै स्वाभिमानी, देशभक्त छ जति विगतका दिनका सरकार थिए । सैन्य गठबन्धनमा जान लाग्यो भन्ने यस्ता सनसनीपूर्ण विषय कुरा उठाइएको छ । स्वाभिमानी देशको राष्ट्रवादी, देशभक्त र देशको हितमा काम गर्ने सरकार कुनै सैन्य गठबन्धनमा जाँदैन,’ मन्त्री खड्काले भने ।

सांसदहरूले सरकार एसपीपीमार्फत् अमेरिकी सैन्य गठबन्धनमा आबद्ध हुन लागेको हो भनी प्रश्न गरेका थिए । 

‘हल्लाको आधारमा नजाऔं, राष्ट्रवादी, देशभक्त सरकारले के ठीक, के गलत भन्ने कुरा विश्लेषण गरेर निर्णय गर्छ । देशको हितमा नहुने कुरा कल्पना पनि गर्न सकिँदैन,’ मन्त्री खड्काले भने, ‘विश्वासका साथ निवेदन गर्न चाहन्छु, प्रधानसेनापतिको अमेरिका भ्रमण विगतको जस्तै नियमित भ्रमण हो । यो भ्रमणमा कुनै सम्झौता गर्ने कुरा कल्पना बाहिरको कुरा हो ।’