विपद् व्यवस्थापन कार्यलाई व्यवस्थित तथा प्रभावकारी पार्ने उद्देश्यका साथ नेपाल सरकारका विभिन्न सरोकारवाला मन्त्रालय, सुरक्षा निकाय, सरकारी एवं गैरसरकारी निकायका प्रतिनिधिलाई सहभागी गराई नेपाली सेनाले सञ्चालन गरेको ‘अभ्यास हातेमालो–४’ मंगलवार जंगी अड्डास्थित सभामण्डप हलमा प्रधानसेनापति महारथी प्रभुराम शर्माको प्रमुख आतिथ्यतामा समापन भएको छ ।

समापन कार्यक्रममा मन्तव्य राख्दै प्रधानसेनापति शर्माले विपद् व्यवस्थापन समन्वय संयन्त्रको जाँच, खोज तथा उद्धार क्षमताको मूल्यांकन, विपद्सँग सम्बन्धित विभिन्न योजना अद्यावधिक तथा विपद् व्यवस्थापनसँग सम्बन्धित विभिन्न अभ्यास/गतिविधि सञ्चालनको मुख्य उद्देश्यसहित सञ्चालन भएको अभ्यास उपलब्धिमूलक रहेको विश्वास व्यक्त गरे ।

उनले विभिन्न समयमा आइपर्ने विभिन्न प्राकृतिक प्रकोपको दौरान व्यवस्थापकीय चुनौतीका साथै सुरक्षा चुनौती समेत रहने हुँदा कुनै एक संस्थाको एकल प्रयासबाट मात्र प्रतिकार्य सम्भव नहुने भएकाले एकआपसको समन्वय तथा सहकार्यमा एकीकृत ढंगले अगाडि बढे मात्र लक्षित उद्देश्य प्राप्त हुने बताए ।

प्रधानसेनापति शर्माले अभ्यासमा सहभागी मन्त्रालय, सरकारी तथा गैरसरकारी निकाय, सहजकर्ता तथा सहभागी सम्पूर्णप्रति आभार प्रकट गरेका थिए ।

 
सोमवार रथी सरोजप्रताप राणाले शुभारम्भ गरेको २ दिवसीय अभ्यासको दौरान विपद् व्यवस्थापन सम्बन्धी विविध विषयमा प्रस्तुतीकरण सहितको छलफल तथा अन्तर्क्रिया र टेबलटप अभ्यास सञ्चालन गरिनुका साथै जंगीअड्डा परिसरमा फायर फाइटिङको डेमोन्स्ट्रेसन एवं विभिन्न विपद्को दौरान प्रयोग हुने विपद् व्यवस्थापन सामग्रीको प्रदर्शनी समेत गरिएको थियो । 

अभ्यासमा नेपाली सेनाका बहालवाला तथा अवकाश प्राप्त रथीवृन्द तथा अधिकृत, विभिन्न मन्त्रालय, प्राधिकरण, विभाग र कार्यालयका सहसचिव, प्रदेशस्थित विभिन्न निकायका प्रमुख एवं प्रतिनिधि, गैरसरकारी संघ/संस्थाका प्रमुख एवं प्रतिनिधि, नेपाल प्रहरी, सशस्त्र प्रहरी बल नेपाल र राष्ट्रिय अनुसन्धान विभागका प्रतिनिधि लगायत सरोकारवाला विभिन्न निकायका प्रतिनिधिको उल्लेख्य सहभागिता थियो । 

विपद् व्यवस्थापन कार्यमा प्रत्यक्ष सम्बन्ध राख्ने विभिन्न सरकारी एवं गैरसरकारी निकायलाई सहभागी गराई सञ्चालन हुने संयुक्त अभ्यासले विपद् प्रतिकार्यमा परिचालन हुने सम्पूर्ण निकायको क्षमता अभिवृद्धि भई विपद् व्यवस्थापन कार्य थप प्रभावकारी हुने विश्वास नेपाली सेनाले लिएको छ ।