शुक्रवारदेखि स्वस्तिमा खड्का र अर्पण थापा अभिनित चलचित्र ‘चिसो मान्छे’ हलमा प्रदर्शनरत छ ।

दीपेन्द्र के. खनालद्वारा लिखित एवं निर्देशित चलचित्रले प्रदर्शनअगावै राम्रो ‘हाइप’ बनाएको थियो । यद्यपि चलचित्रको शुरुवाती व्यापार भने ‘औसत’ छ ।

चलचित्रले पहिलो सप्ताहन्तमा १ करोड ३० लाख ७५ हजार रूपैयाँ ग्रस कमाइ गरेको छ । वितरक करण क्रेजीका अनुसार चलचित्रले शुक्रवार ४१ लाख, शनिवार ६२ लाख ७५ हजार र आइतवार २७ लाख ग्रस कमाइ गरेको छ । सोमवार चलचित्रको अकुपेन्सी ५० प्रतिशत छ । 

वितरक क्रेजीले चलचित्रको शुरूवाती व्यापारलाई राम्रो भन्न नसकिने स्वीकार्दै दर्शकबाट राम्रो प्रतिक्रिया प्राप्त गरेको कारण आगामी दिनमा व्यापार बढ्दै जाने विश्वास व्यक्त गरे । ‘दर्शकबाट एकदमै राम्रो प्रतिक्रिया मिलेको छ । हलबाट निस्कने बेला कतिपय दर्शकले चिसो मान्छे २ कहिले बन्छ भनेर सोध्नुभएको छ,’ उनले लोकान्तरसँग भने, ‘यो इनिसियल रुपमा बम्पर व्यापार गर्ने खालको चलचित्र होइन । वर्ड अफ माउथका कारण आगामी दिनमा यसको व्यापार बढ्दै जानेछ । हामी त्यही विश्वासमा छौं ।’

आगामी साता चलचित्रले अझ राम्रो व्यापार गर्न सक्ने वितरक क्रेजीले बताए । उसो त निर्देशन खनालका अघिल्ला चलचित्रहरू ‘पशुपतिप्रसाद’ र ‘आमा’ले पनि वर्ड अफ माउथका कारण पहिलो साताभन्दा दोस्रो सातामा बढी कमाइ गरेका थिए । ‘चिसो मान्छे’लाई शर्मिला पाण्डेले निर्माण गरेकी हुन् ।

चलचित्रमा स्वस्तिमा र अर्पणका साथमा देशभक्त खनाल, अशान्त शर्मा, प्रभाकर न्यौपाने, रामबाबु रेग्मी, झकेन बिसी लगायतका कलाकारको अभिनय छ ।

यात्राको कथामा ‘चिसो मान्छे’ निर्माण भएको हो । कोरोना महामारीको समयमा वैदेशिक रोजगारीमा मृत्यु भएका युवकको शव त्रिभुवन अन्तर्राष्ट्रिय विमानस्थल काठमाडौंबाट बाजुरासम्म पुर्‍याउँदाको कथा चलचित्रमा समेटिएको छ । 

डीएस डिजिटल प्रालिको ब्यानरमा निर्माण भएको ‘चिसो मान्छे’लाई निर्देशक खनालले नै छायाँकन गरेका हुन् भने दीर्घ खड्काले सम्पादन गरेका हुन् ।