वायुसेवा सञ्चालक संघले आन्दोलन फिर्ता लिएर नियमित उडान शुरू गरेकाले नागरिक उड्डयन प्राधिकरण र संघबीच औपचारिक वार्ता नहुने भएको छ ।

हवाई सेवा नियमित भइसकेकाले अब थप वार्ताको आवश्यकता नपरेको नेपाल नागरिक उड्डयन प्राधिकरणका प्रवक्ता जगन्नाथ निरौलाले जानकारी दिए । 

‘वायुसेवा कम्पनीको माग काठमाडौंबाहिरका विमानस्थलमा राति जहाज पार्किङ गर्न असहज हुन्छ भन्ने हो,’ उनले भने, ‘आवश्यक सेवासुविधा प्राधिकरणले दिने र सहजीकरण गर्ने भनिएपछि औपचारिक रुपमा उडान शुरू भइसक्यो ।’ 

मंगलवार राति नै आजबाट उडान गर्ने विषयमा सहमति भइसकेकाले अब औपचारिक वार्ताको जरुरी नभएको निरौलाले बताए । ‘अनौपचारिक कुराकानी गर्न वायुसेवा कम्पनीका प्रतिनिधि प्राधिकरणमा जतिबेला आए पनि हुन्छ,’ निरौलाले बताए ।