भुक्तानी प्रणाली सञ्चालक स्मार्टच्वाइस टेक्नोलोजिज (एससीटी) र गरिमा विकास बैंकबीच एक अर्कोको सेवा प्रयोगका विषयमा सम्झौता भएको छ । दुई संस्थाबीच एससीटी–युपीआई डेबिट कार्ड मार्फत भुक्तानी सेवा प्रदान गर्ने विषयमा सोमवार द्विपक्षीय सम्झौता भएको छ ।

स्मार्टच्वाइस टेक्नोलोजिको तर्फबाट प्रमुख कार्यकारी अधिकृत नारायण प्रकाश भुजु र गरिमा विकास बैंक लिमिटेडको तर्फबाट प्रमुख कार्यकारी अधिकृत गोविन्दप्रसाद ढकालले उक्त सम्झौतापत्रमा हस्ताक्षर गरेका छन् । 

स्मार्टच्वाइसले सर्वसाधारणलाई सबै प्रकारका बैंकिङ्ग सेवा सुबिधा पुर्‍याउँदै आएकोले पनि यो सम्झौता थप प्रभावकारी हुने बताएको छ । गरिमा विकास बैंक लिमिटेडसँगको सहकार्यले डिजिटल इकोसिस्टमको विकासमा थप योगदान पुग्न जाने दाबी स्मार्ट च्वाइसले गरेको छ । 

सम्झौतापछि ग्राहकलाई भुक्तानी कार्डको आधुनिक, सुरक्षित, गुणस्तरीय तथा भरपर्दो सुविधा प्रदान गर्न सहजता प्राप्त गर्ने छ । एससीटी सञ्जालको प्रयोगबाट ग्राहकले नेपाल तथा भारतभित्र एटीएम, पिओएस, इकमर्शसहितका सेवा सजिलै लिन सक्ने पनि उल्लेख छ ।