नेपालको मौलिक लोक संगीतमा आधारित रियालिटी शो ‘आइएमई नेपाल लोकस्टार’ को दोस्रो सिजनको लागि पावर बाई स्पोन्सरका रुपमा जगदम्बा स्टील्स अन्र्तगतको जगदम्बा सुपर साइन जस्तापाता अनुवन्ध भएको छ ।

जगदम्बा स्टील्सका महाप्रबन्धक, मनोज तिवारी र हिमालय टेलिभिजनका अध्यक्ष धर्मराज भुसालबीच काठमाडौं स्थित र्‍याडिसन होटलमा बिहीवार आयोजित विशेष समारोहमा सम्झौता पत्रमा हस्ताक्षर भएको हो । 

लोकस्टारको डिजिटल अडिसन हालै सम्पन्न भएको छ जहाँ हजारौं प्रतिभाहरुले लोकस्टार सिजन २ को उपाधि जित्ने आकांक्षासहित आवेदन दिएका छन् । 

यी आवेदनमध्येबाट छानिएका प्रतिभासँगै देशका बिभिन्न स्थानमा हुने फिजिकल अडिसनबाट पनि प्रतिभाहरुको छनौट गरिने छ ।

केही दिनमै नयाँ सिजनको सुटिङ प्रारम्भ हुने र साउन महिनाको अन्त्यदेखि हरेक मंगलवार र बुधवार राति ८ बजे कार्यक्रम प्रसारण हुनेछ । 

कुमार बस्नेतदेखि प्रकाश सपुतसम्मका स्टारहरु 

यसैवीच दोस्रो सिजनका लागि निर्णायकहरुको छनौट गरिएको छ ।

नेपाली लोकसंगीत शिखर पुरुष कुमार बस्नेत यसपटक नेपाल लोकस्टारको निर्णायकका रुपमा अनुबन्ध गरिएको  आयोजकले जनाएको  छ । 

उमेरले झण्डै ८० बर्ष पुग्न लागेका बस्नेत नयाँ पुस्ताका प्रतिभा तिखार्ने अभिलासा बोकेर लोकस्टारमा निर्णायकका रुपमा अनुबन्ध भएका हुन । 

यसैगरी चर्चित लोक तथा दोहोरी गायिका ज्योती मगर पनि निर्णाकका रुपमा अनुवन्ध भएकी छन् ।

पहिलो सिजनमा पनि निर्णायक रहेका रामजी खाँड यसपटक पनि लोकस्टारमा निर्णायककै रुपमा रहनेछन् ।

यस्तै चर्चित लोक दोहोरी गायक कुलेन्द्र बिश्वकर्मा पनि यो सिजनको निर्णायक छन् । 

लोकस्टार सिजन २ लाई फिल्म एवं रियालिटी शोहरूको सफल निर्देशन गरिसकेका निर्देशक शिमोस सुनुवारले निर्देशन गर्ने छन् भने चर्चित एरेन्जर एवं संगीतकर्मी आशिष अबिरल संगीत निर्देशकका रुपमा अनुवन्धित भएका छन् । 

चर्चित लोकगायक प्रकाश सपुत कार्यक्रम सञ्चालक एवं ब्राण्ड आइकनका रुपमा रहेका छन् ।