बलिवुड अभिनेत्री तापसी पन्नुले राजकुमार हिरानीको आगामी फिल्म ‘डंकी’मा शाहरुख खानसँग ‘अनस्क्रीन रोमान्स' गर्ने भएकी छन् । शाहरुख बलिवुडमा ‘रोमान्स आइकन'कै रूपमा परिचित छन् । 

‘डंकी’को मुख्य भूमिकामा शाहरुखसँग तापसीले स्क्रीन शेयर गर्ने पक्का पक्की भएको छ । उनलाई मुख्य भूमिकाका लागि निर्देशक हिरानीले अनुबन्ध गरेको भारतीय सञ्चारमाध्यम ‘आजतक’ले अनलाइन संस्करणमा उल्लेख गरेको छ । 

तापसीले आफ्नो फिल्मी करियरमा एक से एक दमदार भूमिकामा अभिनय गरिसकेकी छन् । उनले अभिनय गरेको ‘थप्पड’, ‘मुल्क’, ‘पिंक’ लगायतका फिल्म व्यवसायिक रूपमा सफल बनेका थिए । 

तापसीले शाहरुखसँग काम गर्न पाउनु ‘शौभाग्यको कुरा’ भएको बताएकी छन् । उनले शाहरुखसँग काम गर्ने आफ्नो सपना पूरा हुन लागेको भन्दै आफू निकै उत्साहित रहेको प्रतिक्रिया दिएकी छन् । उनको उत्साहको अर्को कारण शाहरुखसँगको 'रोमान्टिक एंगल' पनि भएको आफैले खुलाएकी छन् । 

निर्देशक हिरानीले ‘डंकी’मा शाहरुख र तापसीको रोमान्टिक गीत रहेको बताएका छन् । यद्यपि, यो फिल्म पूर्ण रुपमा ‘लब स्टोरी’ भने नरहेको बताइन्छ । 

‘डंकी’ अगावै तापसीको फिल्म ‘साबा मिठ्ठु’ जुलाई १५ मा रिलिज हुँदै छ ।