जनता समाजवादी पार्टी (जसपा) नेपालका संघीय परिषद् अध्यक्ष डा. बाबुराम भट्टराईले पार्टी निर्माण गर्ने तरिका क्षेत्रीय दलतिरै सीमित हुनतिर अभिमुख र अभिप्रेरित देखिएको निष्कर्ष निकालेका छन् ।

मंगलवार शुरू भएको आफूपक्षीय केन्द्रीय परिषद् सदस्यको भेलामा ‘पार्टी रूपान्तरण/पुनर्गठनको औचित्य र कार्यभार’ राजनीतिक प्रतिवेदन गर्दै भट्टराईले पार्टीको मूल नेतृत्वमा देशका अन्य भाग र प्रदेशमा पार्टी निर्माणको प्रयत्न गर्ने हुटहुटी नदेखिएको बताए ।

‘पार्टी निर्माणको तरिका क्षेत्रीय दलतिरै सीमित हुनतिर अभिमुख र अभिप्रेरित देखियो । देशका अन्य भाग र प्रदेशमा पार्टी निर्माणका लागि संगठित तथा संस्थागत प्रयत्न गर्ने हुटहुटी मूल नेतृत्वमा नै देखिएन,’ प्रतिवेदनमा उल्लेख छ ।

प्रतिवेदनमा उल्लेख छ, ‘पार्टी एकताको आधारभूत बुझाइ र मनोविज्ञान मधेश आन्दोलनको जगमा बनेको पार्टी हिस्साको गरिमा, महत्त्व र संवेदनशीलतालाई आत्मसात गर्दै पार्टी एकतामा संलग्न सबै पक्षको समुचित सहभागितासहित राष्ट्रिय चरित्रको समावेशी पार्टी निर्माण गर्ने थियो । साथै कांग्रेस, कम्युनिस्ट जस्ता परम्परावादी मूलधार दलहरूको विकल्प निर्माण गर्दै देशलाई आर्थिक विकास, सुशासन र समृद्धिको युगतिर अभिमुख गर्नु थियो ।’

प्रतिवेदनमा डा. भट्टराईले पार्टी पुनर्गठन गर्नुपर्ने विषयलाई जोड दिएका छन् ।