चकलेटी अभिनेता आर्यन सिग्देल नयाँ चलचित्रमा अनुबन्धित भएका छन् । उनी ‘सायरा’ नामक चलचित्रका लागि अनुबन्धित भएका हुन् । निर्माण कम्पनी डि.बि.आर. मिडिया एण्ड मुभिज प्रालि र अभिनेता आर्यनबीच आइतवार लिखित सम्झौता भएको हो । 

रघु परियार प्रस्तुतकर्ता रहेको चलचित्रको छायाँकन असोजपछि हुने छ । चलचित्रको ९० प्रतिशत छायांकन अष्ट्रेलिया र १० प्रतिशत नेपालमा हुने बताइएको छ । 

सामाजिक र प्रेमकथामा चलचित्र तयार हुनेछ । ‘चलचित्रमा सोसल ड्रामासँगै प्रेम कथा देखाइने छ । चलचित्रको भूमिकालाई सुहाउँदो भएकाले आर्यनजीलाई अनुबन्धित गरेका हौँ । उहाँ पनि भूमिकालाई लिएर उत्साहित हुनुहुन्छ’ प्रस्तुतकर्ता रघुले भने । 

चलचित्रको अन्य ‘कास्ट’ तथा ‘क्रू’को बारेमा केही समयमै जानकारी दिने प्रस्तुतकर्ता रघुले बताए । चलचित्र कथा उनकै रहनेछ । निर्देशक भने भारतीय रहने उनले बताए । ‘लाइन–अप पूरा भएपछि पूर्ण रूपमा जानकारी दिनेछौँ । निर्देशक बलिउडमा काम गरिरहेका भारतीय नै हुनेछन । उहाँलाई अनुबन्ध गरेपछि जानकारी गराउने छौँ’ प्रस्तुतकर्ता रघुले भने । 

पछिल्लो समय पर्दामा नदेखिएका आर्यन चलचित्रको विषयवस्तुले आकर्षित भएका हुन् ।  सुहाउँदो क्यारेक्टर पाएपछि चलचित्रमा अभिनय गर्ने सम्झौता गरेको आर्यनले बताए ।

चलचित्रको कथावस्तु अनुसार नै डायस्पोरामा छायांकन गर्न लागिएको प्रस्तुतकर्ता रघुको भनाइ छ । चलचित्रको अधिकांश छायांकन अष्ट्रेलियाको सिड्नीमा हुनेछ भने केही प्रतिशत मेलवर्नमा समेत गरिने उनले जनाए । 

पर्दामा लभ स्टोरीलाई जीवन्त बनाउन माहिर मानिने आर्यनले केही समय अगाडि निर्माण तथा अभिनय गरेको चलचित्र ‘कायारा’ झैँ सुनिने नाम भएको ‘सायरा’मा काम गर्ने तयारी गर्न लागेका हुन् । आर्यन अन्य केही चलचित्रमासमेत अभिनय गर्ने तयारीमा छन् ।