नेपाली कांग्रेसका नेता प्रदीप गिरीको स्वास्थ्य अवस्था गम्भीर बनेको छ । झण्डै एक महिनादेखि ललितपुरको मेडिसिटी अस्पतालमा उपचार गराइरहेका उनको स्वास्थ्य अवस्था गम्भीर बनेको हो । 

घाँटीमा क्यान्सरको समस्या रहेको उनी भारतमा उपचार गराई नेपाल फर्किएका थिए । उनको स्वास्थ्यमा समस्या देखिएपछि गिरी उपचारका लागि साउन दोस्रो साता मेडिसिटी अस्पताल भर्ना भएका थिए । 

आईसियूमा उपचार गराइरहेका उनलाई बिहीवारदेखि भेण्टिलेटरमा सारिएको अस्पताल स्रोतले जानकारी दिएको छ । उनको स्वास्थ्य अवस्था गम्भीर भएको कांग्रेस नेता विमलेन्द्र निधिले पुष्टि गरेका छन् । उनले ट्वीटरमार्फत गिरीको स्वास्थ्य लाभको कामना पनि गरेका छन् । 

अस्पताल पुगेर गिरीको स्वास्थ्य अवस्थाबारे जानकारी लिएपछि निधिले लेखेका छन्, ‘आदरणीय मेरा अग्रजभ्रातातुल्य मित्र, समाजवादी, गान्धीवादी, विचारक, योद्धा, नेपाली कांग्रेसका नेता प्रदीप गिरीलाई मेडिसिटीमा दोस्रोपटक हेरेर बाटोमा फर्कदैँ छु । स्तब्ध र निरीह छु । ईश्वरीय चमत्कारको लागि प्रार्थना गर्दछु–सबैले प्रार्थना गरौँ !!!’