नेपाली कांग्रेसका नेता डा.शेखर कोइरालाले कांग्रेस नेता स्व. प्रदीप गिरी निडर नेता भएको बताएका छन् । आइतवार बिहान गिरीलाई श्रद्धाञ्जली दिन मेडिसिटी अस्पताल पुगेका उनले गिरी आफ्नो कुरा स्पष्टसँग राख्नसक्ने निडर नेता भएको बताएका हुन् । गिरीको सादगी जीवनबाट नेपालका राजनीतिज्ञहरूले सिक्नुपर्ने उनको भनाइ थियो । 

कोइरालाले भने, ‘उहाँ निडर मान्छे । पार्टीले मलाई के गर्छ, कसो गर्छ भन्ने पनि थिएन । त्यसलाई कसैले अराजक भन्ला, कसैले विचारक भन्ला, कसैले पार्टीभन्दा अलिकति माथि भन्ला यो आफ्नो ठाउँमा छ । उहाँबाट हामीले सिक्नुपर्ने भनेको सादगी जीवन पनि हो ।’

त्यस्तै गृहमन्त्री तथा कांग्रेसका नेता बालकृष्ण खाणले गिरी नेपाली राष्ट्रियताको सम्बर्द्धन र जनताको अधिकारलाई स्थापित गर्न जीवनभर लागिरहेका बताए । गिरीले कांग्रेसलाई समावेशी बनाउन महत्वपूर्ण भूमिका निर्वाह गरेको उनले बताए । 

गृहमन्त्री खाणले भने, ‘नेपालको राजनीतिमा उहाँको प्रतिवद्धता प्रजातान्त्रिक समाजवादप्रति थियो । प्रजातान्त्रिक समाजवादको एउटा प्रखर चिन्तककै रुपमा हुनुहुन्थ्यो उहाँ । उहाँको राजनीति दार्शनिक ढंगको थियो । राजनीतिलाई सही दिशामा लिएर जाने, नेपालको राष्ट्रियताको सम्बर्द्धन र जनताको जनाधिकारलाई स्थापित गर्ने क्रममा उहाँ जिन्दगीभर लागिरहनु भयो ।’ 

बागमती प्रदेशका मुख्यमन्त्री राजेन्द्रप्रसाद पाण्डेले गिरीलाई समाजवादी विचारका चिन्तक तथा अध्ययनशील व्यक्तित्वको रूपमा उल्लेख गरे । गिरी कम्युनिष्ट र कांग्रेस मिलेर नै देशको विकास गर्नुपर्छ भन्ने पक्षमा रहेका पाण्डेले बताए । विगतमा पञ्चायतविरुद्ध कम्युनिष्ट र कांग्रेसको एकताको पक्षमा गिरी रहेकै कारणले पनि सो आन्दोलन सफल भएको उनले स्मरण गरे । 

अर्थमन्त्री तथा नेकपा (माओवादी केन्द्र) का नेता जनार्दन शर्माले गिरी नेपाली राजनीतिको एउटा ताराको रूपमा रहेको उल्लेख गरे । गिरीलाई सादगी जीवन जिउने निष्ठावान राजनीतिज्ञको रूपमा अथ्र्याउँदै उनले गिरीले लोकतन्त्र र समाजवादको गहिरो व्याख्या गर्ने गरेको स्मरण गरे । 

नेपाली कांग्रेसका नेता उदयसमशेर राणाले प्रदीप गिरी निःस्वार्थी नेता भएको उल्लेख गरेका छन् । कुनै पनि लोभ नरहेको भन्दै राणाले सांसद बनेर सरकारलाई दबाब दिनुमात्रै उनको चाहना रहेको बताए । 

७५ वर्षीय गिरीको शनिवार राति साढे ९ बजे उपचारका क्रममा मेडिसिटी अस्पताल निधन भएको थियो ।