सामाजिक सुरक्षा कोषमा आबद्ध नहुनेलाई कानूनको दायरामा ल्याइने मन्त्रीको चेतावनी

सरकारले सामाजिक सुरक्षा कोषमा आबद्ध हुन सबै रोजगारदाता तथा योगदानकर्तालाई आह्वान गरेको छ । उनले कतिपय घोषित क्षेत्रहरू अझैं सामाजिक सुरक्षा कोषमा आबद्ध नभएको भन्दै उनले सबैलाई कानूनअनुसार कारबाहीको दायरामा ल्याइने चेतावनी दिए । 

सरकारले विराटनगर र सिमरामा पनि सामाजिक सुरक्षा कोषको शाखा कार्यालय स्थापना गरेको छ । श्रम, रोजगार तथा सामाजिक सुरक्षामन्त्री शेरबहादुर कुँवरले बुधवार मन्त्रालयबाटै दुवै ठाउँमा स्थापना गरिएको शाखा कार्यालयको उद्घाटन गरेका छन् । 

संघीयताको मर्मअनुसार सामाजिक सुरक्षा कोषलाई गतिशील बनाउनका लागि सो कार्यालयको स्थापना र सेवा आरम्भ गरिएको मन्त्री कुँवरले बताए । उनले सो कोषमा आबद्ध हुन सबै रोजगारदाता र योगदानकर्ताहरूलाई आग्रह गरे । सामाजिक सुरक्षा कोषमा आबद्ध नभएकाहरूलाई सरकारले कानुनी दायरामा ल्याएरै छाड्ने मन्त्री उनको भनाइ थियो ।
‘संघीयताको मर्म अनुसार दुई वटा शाखा कार्यालय विस्तार गरिएको हो । यो आवश्यक्ताअनुसार विस्तार गर्दै लगिनेछ’, मन्त्री कुँवरले भने, ‘म रोजगारदाताहरूलाई योगदानकर्ताहरूलाई आग्रह गर्न चाहन्छु–सामाजिक सुरक्षा कोषमा आबद्ध हुनुहोस् । कतिपय रोजगारदाताहरू, कतिपय घोषित क्षेत्रहरू पनि सामाजिक सुरक्षा कोषमा आवद्ध नभएको हामीले देखेका छौँ । सबैलाई कानून, नियम, विधि, विधानअनुसार कोषको दायरामा ल्याइनेछ ।’

मन्त्री कुँवरले योगदानकर्ता र रोजगारदाताहरूको सेवालाई सहज बनाउनका लागि सरकारले आवश्यक अनुसार देशका अन्य जिल्लाहरूमा पनि सामाजिक सुरक्षा कोषको शाखा कार्यालय स्थापना गर्ने योजना तय गरेको बताए ।

श्रम, रोजगार तथा सामाजिक सुरक्षा मन्त्रालयका सचिव एकनारायण अर्यालले श्रमिकहरूको नजिक रहेर सेवा प्रदान गर्नका लागि कोषको २ वटा शाखा कार्यालय स्थापना गरिएको बताए । उनले नेपालगन्ज र बुटवलमा पनि कोषको सम्पर्क कार्यालय स्थापना गरी सेवा आरम्भ गर्ने निर्णय गरिएको जानकारी दिए ।