कीर्तिपुर नगरपालिकाले नगरभित्रका मापदण्डविपरीतका संरचना हटाउने कार्य शुरु गरेको छ । पटक–पटकको लिखित तथा मौखिक आग्रह र चेतावनीपछि पनि अटेर गरेका कारण बिहीवार नगरपालिकाले त्यस्ता अवैध संरचना डोजर लगाएर भत्काएको हो । दिउँसो शुरु गरिएको अवैध संरचना हटाउने कार्यमा नगरप्रमुख राजकुमार नकर्मी पनि उपस्थित थिए । 

नगरपालिकाको वडा १० मा पर्ने उक्त संरचना स्थानीय जयबहादुर महर्जनको पर्खाल हो । नगरपालिकामा गरिएको नक्सा पासविपरीत सो संरचना बनेकाले भत्काउनुपरेको नगरपालिकाका उपप्रमुख एवं प्रवक्ता सुनिता शाक्यले बताइन् । 

महर्जनलाई यसअघि अघिल्ला नगरप्रमुख रमेश महर्जनकै कार्यकालमा नगरपालिकाले संरचना मापदण्ड विपरीत भएको र सार्वजनिक आवागमनमै बाधा पार्ने भएकाले भत्काउन अनुरोध गरिएको जानकारी पनि उपमेयर शाक्यले दिइन् । ‘उहाँहरूसँग नै महर्जनले आफ्नो संरचना आफैँ भत्काएर हटाउने प्रतिबद्धता जनाउनुभएको रहेछ । तर हामी आइसकेपछि पनि अनुरोध गर्दा नहटाइएपछि भत्काउन बाध्य भयौँ’, उनले थपिन् । नियमविपरीतका संरचना हटाउन स्थानीय जनताले पहिलेदेखि नै माग राख्दै आएको उपप्रमुख शाक्यले बताइन् । 

यससँगै नगरपालिकाले सार्वजनिक जग्गा मिचेर बनाइएका संरचना हटाउने कार्य  छिट्टै थाल्नेसमेत उनको भनाइ थियो । 

काठमाडौं महानगरपालिकाले पनि स्वीकृति नलिई बनाइएका अवैध संरचना, स्वीकृति लिएभन्दा फरक प्रयोजनमा प्रयोग गरिएका संरचना हटाउने अभियान सञ्चालन गरिरहेको छ ।