नेपाली कांग्रेसका महामन्त्री गगन थापाले प्रदीप खड्का अभिनित चलचित्र ‘प्रकाश’ हेरेका छन् । आइतवार हल पुगेर थापाले शुक्रवारदेखि प्रदर्शनमा आएको चलचित्र हेरेका हुन् । अभिनेता प्रदीप स्वयंले यो कुराको जानकारी दिँदै खुशी व्यक्त गरेका छन् ।

उनले आइतवार ‘प्रकाश’ हेर्ने दर्शकमध्ये गगन थापा विशेष रहेको उल्लेख गरेका छन् । उनले गगनसँगको तस्वीर फेसबुकमा शेयर गर्दै लेखेका छन्, ‘हिजो प्रकाश हेर्न आउनु भएकामध्ये एक जना दर्शक मेरा लागि निक्कै विशेष हुनुहुन्थ्यो ।’ आफू राजनीतिक व्यक्ति हुँदै नभएको तर राजनीतिक विषय, देशको नेतृत्वलगायतका विषयहरूमा धेरै चाख लाग्ने प्रदीपले बताएका छन् । अझ चलचित्र ‘प्रकाश’को भूमिका गर्दै गर्दा आम जीवनमा नेतृत्वको भूमिकालाई धेरै नजिकबाट महसुस गर्न पाएको प्रदीपको भनाइ छ । 

‘नेतृत्वलाई मैले जे जति बुझेको छु, त्यस आधारमा यो पुस्ताका सबैभन्दा आशालाग्दा नेता को हुने भन्ने प्रश्नको उत्तरमा– गगन थापा भन्ने उत्तर दिन मलाई खासै सोच्नु पर्दैन’ गगनको प्रशंसामा केही शब्द खर्चिदै प्रदीप अगाडि लेखेका छन्, ‘सुखद संयोग, हिजो गगन दाइसँगको भेट जुर्यो । चलचित्र हेरिसकेपछि, दाइसँग समाज, राजनीति, चलचित्रलगायतका विषयमा छलफल भयो । दाइलाई नजिकबाट नियाल्न पाउँदा उहाँका दृष्टिकोणहरू अझै स्पष्ट बुझ्न पाएँ ।’

देशको नयाँ व्यवस्था परिवर्तन महसुस गर्न नयाँ नेतृत्व पाउन जरूरी उल्लेख गर्दै अनि मात्र ‘प्रकाश’हरूको भोगाइको परिवर्तन हाम्रै पालामा सम्भव रहेको उनले बताएका छन् । 
उनले अबको नेतृत्वमा गगनजस्तै जोशिला व्यक्तित्वलाई देख्न पाइयोस्समेत भनेका छन् । 

प्रदीप खड्का, दीया मास्के, रेणु योगी, प्रकाश घिमिरेलगायतको मुख्य भूमिका रहेको चलचित्र ‘प्रकाश’लाई दिनेश राउतले निर्देशन गरेका हुन् । विकास सुवेदीको लेखन रहेको चलचित्रले सरकारी शिक्षक बन्न संघर्ष गरिरहेको जुम्लाको एक युवाको कथा पेश गरेको छ । त्यसभित्र सशस्त्र जनयुद्धदेखि वर्ग विशेदको कथासमेत देखाइएको छ ।