निजी क्षेत्रको अग्रणी वायुसेवा कम्पनी यती एअरलाइन्सले जहाज थप गरेको छ । यो वायुसेवाले सेवा विस्तार गर्ने क्रममा एटिआर ७२–५०० नामक जहाज थप गरेको हो । यतीको थप गरेको नयाँ विमान आइतवार ३ बजेर १५ मिनेटमा त्रिभुवन अन्तर्राष्ट्रिय विमानस्थलमा अवतरण गरेको छ । यो यतीको छैटौँ एटीआर जहाज हो । 

यतीले भित्र्याएको यो जहाज ७० सिट क्षमताको हो । यतीले यो जहाज अष्ट्रेलियाको एभिएसन कम्पनीसँग भाडामा ल्याएको हो । उक्त विमान क्याप्टेन ओलिभर ज्यासन ज्याफ्रीले अष्ट्रेलिया, सिंगापुर, थाइल्याण्ड हुँदै नेपालमा ल्याएको कम्पनीका प्रवक्ता तथा हवाई सुरक्षा प्रमुख सुदर्शन बर्तौलाले बताए । एमएसएन नं ९८६ सिरिजको उक्त विमानको पहिलो उडान सन् २०११ मा भएको थियो ।

जम्मा १० हजार साइकल मात्र उडान गरेको उक्त विमान नेपालमा उडान गर्ने अन्य विमानभन्दा पछिल्लो विमान भएको कम्पनीले दाबी गरेको छ । एटीआर विमानको जम्मा साइकल ७० हजार हुन्छ । एक अवतरणलाई एक साइकल गणना गरिन्छ । 

विमान संख्या थप गरेसँगै कम्पनीले हाल उडान गर्ने गन्तव्यमा नै सेवा विस्तार गर्ने नीति लिएको प्रवक्ता बर्तौलाले जानकारी दिए । विमानको आवश्यक कागजी प्रक्रिया पूरागरी रंगरोगन गरेपश्चात् विमानले दशैँ अगाडिनै उडान गर्नेछ । यसले गर्दा दशैंको बेला हुने टिकट अभावलाई पूरा गर्न सहयोग हुने विश्वास लिएका पनि उनले बताए । 

यही आर्थिक वर्षभित्र अर्को एक विमान थप गर्ने र त्यसपछि नयाँ गन्तब्यहरुमा सेवा विस्तार गर्ने उनले बताए । विमान थप भएपछि ५ वटा विमानलाई आधार बनाई उडान गर्ने र एउटा बवमानलाई जगेडामा राखी मर्मत तथा उडान ढिला हुँदा प्रयोग गरिने कम्पनीले जनाएको छ  । 

एअरलाइन्सले हाल नेपालको सुगम गन्तव्यहरु काठमाडौं, चन्द्रगढी, विराटनगर, जनकपुर, सिमरा, पोखरा, भैरहवा, नेपालगन्ज लगायत पर्वतीय उडानहरु गर्दै आएको छ । यसले अन्तर्राष्ट्रियतर्फ चार्टर र नन सेड्युल उडानसमेत गर्ने अनुमति पाएको छ ।