नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले प्रतिनिधि सभा विघटन गरेर घोषणा गरिएको चुनावलाई केपी ओलीले अहिलेको चुनावसँग तुलना गरेपछि आपत्ति जनाएका छन् । 

प्रतिनिधि सभाको अन्तिम बैठकमा शनिवार समापन मन्तव्य राख्दै प्रचण्डले ओलीले गरेको प्रतिगमनको परिभाषाप्रति आपत्ति जनाएका हुन् । 

‘प्रतिपक्षका नेताले प्रतिगमन र लोकतन्त्रको परिभाषा दिएको सुन्दा अचम्म लाग्यो, संविधानमा हुँदै नभएको अधिकार, संसद विघटन गर्न नमिल्ने संविधानको सबैले सचेत रूपले व्यवस्था गरेको होइन ? सरकार बन्ने अर्को सम्भावना हुँदा हुँदै प्रतिनिधि सभा विघटन प्रतिगमन नभएर के थियो ?’, प्रचण्डले भने, ‘अहिले गरेको चुनावको त्यो बेला गरिएको घोषणासँग तुलना गर्ने ? तुलना पनि हद हुन्छ नि ? के संसद्मा अरु केही जान्ने छैनन् ? नेपाली सबै भेडा हुन् ?’

ओलीले गरिरहेको तर्क बनावटी रहेको भन्दै प्रचण्डले पार्टीभित्र काम गर्ने अवसर नदिएको भन्ने कुरा गलत भएको दाबी गरे ।