अर्थमन्त्री जनार्दन शर्माले अबको केही वर्षपछि मुलुक हाइड्रोजन युगमा जाने बताएका छन् । नाडा ईभी एक्स्पो २०२२ को उद्घाटन समारोहलाई सम्बोधन गर्दै अर्थमन्त्री शर्माले यस्तो बताएका हुन् ।

ग्रीन अर्थतन्त्र निर्माणतर्फ नेपाल अगाडि बढ्न सक्ने उनले बताए । अर्थमन्त्री शर्माले अबको केही वर्षमा ग्रीन हाइड्रोजनबाट चल्ने गाडीको युगमा जानुपर्नेमा जोड दिए । उनले भने, ‘नाडाले सोचोस् अबको केही वर्षमा हाइड्रोजनबाट चल्ने गाडीको युगमा हामी पुग्नुपर्छ ।’

अब डिजेल र पेट्रोलको युग गएको भन्दै अर्थमन्त्री शर्माले ईभीमा अगाडि बढ्न आग्रह गरे । उनले अहिले सरकारको नीति आयात ङटाउने र निर्यात बढाउने भएको सुनाए । उनले अब ती नीति कसैगरी पछि नहट्ने बताए ।

‘कतिपय पोलिसी पछि हट्न मिल्छन् तर कतिपय पोलिसी बाट सरकार पछि हट्न सक्दैन, राष्ट्रका लागि आवश्यक पोलिसीमा सरकार पछि हट्न सक्दैन’, अर्थमन्त्री शर्माले भने ।

अर्थमन्त्री शर्माले  निजी क्षेत्रलाई अप्ठ्यारो पार्ने सरकारको उद्देश्य नभएको बताए । अर्थतन्त्र संकटमा रहँदा आयातमा प्रतिबन्ध लगाइएको भन्दै उनले यस समस्याको समाधान अगाडि बढ्दै जाने बताए । अहिले राज्यको नीति आँकडामा देखिने गरी निर्यात वृद्धि गर्नु रहेको उनले बताए ।