गायन रियालिटी शो ‘द भ्वाइस’को अमेरिकी संस्करणमा नेपाली मूलकी १७ वर्षीया किशोरी परिजिता बाँस्तोलाले लोभलाग्दो प्रस्तुति दिएकी छन् । मंगलवार राति शोको ब्लाइण्ड अडिसनमा उनले प्रस्तुति गर्दा चारैजना कोच मन्त्रमुग्ध भए । उनको प्रस्तुतिमा सबै कोच टर्न भएका थिए । उक्त शो मा जोन लेजेण्ड, क्यामिला काबेलो, ग्वेन स्टेफानी र ब्लेक शेल्टन कोचका रूपमा भूमिका निभाइरहेका छन् । 

चारैजना कोचले परिजिताको गायकीको खुलेर प्रशंसा गरे । उनले तिमोथी लि म्याकेन्जीको चर्चित अंग्रेजी गीत ‘जेलस’ गाएकी थिइन् । निर्णायकहरूले उनीसँग सहकार्य गर्न गाउँदा खुशी लागेको समेत बताए । 

परिजिताले आफ्नो कोच छान्नुअघि चारैजना निर्णायकलाई नेपालबाट लगेको रुद्राक्षको माला घाँटीमा लगाइदिएकी थिइन् । परिजिताको प्रस्तुतिको भिडियो सार्वजनिक भएसँगै चौतर्फी तारिफ भइरहेको छ । नेपालीहरूले पनि उनको निकै प्रशंसा गरेका छन् । पूर्वमिस नेपाल शृंखला खतिवडाले ‘वाह’ लेख्दै परिजिताको प्रस्तुतिको भिडियो ट्वीटरमा शेयर गरेकी छन् ।