यस वर्षको सिबिफिन–नाफिज बैंकिङ पत्रकारिता पुरस्कारबाट अनलाइनखबर डटकमका विजय पराजुली र टक्सार म्यागेजिनका अनुप आचार्य पुरस्कृत भएका छन् । बैंक तथा वित्तीय संस्था परिसंघ नेपाल (सिबिफिन) को १ लाख रुपैयाँ धनराशीको आर्थिक सहयोगमा स्थापित उक्त पुरस्कार नेपाल आर्थिक पत्रकार संघ (नाफिज) को बुधवार सम्पन्न १४औँ वार्षिकोत्सवको अवसरमा प्रदान गरिएको हो ।

नेपाल राष्ट्र बैंकका डेपुटी गभर्नर बमबहादुर मिश्र र सिबिफिनका अध्यक्ष पवनकुमार गोल्यानले पुरस्कृत पत्रकारहरूलाई कदरपत्र तथा चेक हस्तान्तरण गरे । उक्त पुरस्कारको राशी ५०–५० हजार रुपैयाँको रहेको छ ।

बैंकिङ बिटमा कलम चलाउँदै आएका आर्थिक पत्रकारको वृत्ति विकास, क्षमता विस्तार र असल पत्रकारिता अभ्यासमा प्रोत्साहन पुर्‍याउने हेतुले उक्त पुरस्कार प्रदान गर्न थालिएको र पुरस्कारले स्वस्थ तथा खोजमुलक आर्थिक पत्रकारितालाई प्रवद्र्धन गर्ने जनाइएको छ । 

त्यसैगरी सोही अवसरमा ‘शारदा– ढुण्डीराज भट्टराई नाफिज आर्थिक पत्रकारिता पुरस्कार’ बाट बिजमाण्डु डटकमका खेमराज श्रेष्ठसमेत पुरस्कृत भएका थिए ।