पाकिस्तानका विदेश मन्त्री बिलावल भुट्टो जरदारीले आफ्नो देशले संयुक्त राष्ट्र संघ (युएन) सुधारको नाममा भारतलाई संयुक्त राष्ट्रसंघको सुरक्षा परिषद्मा सामेल गराउँने लगायतको प्रस्तावको विरोध गर्ने बताएका छन् ।

वासिङ्टनस्थित पाकिस्तानी दूतावासमा आयोजित पत्रकार सम्मेलनमा उनले सो कुरा बताएका हुन् । पाकिस्तानका विदेशमन्त्रीले भारतको संयुक्त राष्ट्रसंघ सुरक्षा परिषद्को प्रस्तावको विरोध गरे पनि जलवायु संकटको विषयमा भारत र अन्य देशहरूसँग काम गर्ने इच्छा व्यक्त गरे । ‘जलवायु परिवर्तनको मुद्दामा हामीले सँगै काम गर्नुपर्छ । अमेरिका र चीनलाई यसमा सँगै काम गर्न आग्रह गर्छु’, उनले भने । 

भर्खरै सम्पन्न संयुक्त राष्ट्रसंघ महासभामा भारतले आफ्नो आर्थिक र विदेश नीतिको विस्तारका निम्ति थुप्रै विकासशील र विकसित राष्ट्रहरूबाट प्रशंसा प्राप्त गरेको छ । कतिपय देशहरूले महासभामा भारतको संयुक्त राष्ट्रसंघ सुरक्षा परिषद्को प्रस्तावलाई पनि समर्थन गरेका थिए । यद्यपि, महासभामा आफ्नो सम्बोधनका क्रममा पाकिस्तानी प्रधानमन्त्री शहबाज शरीफले गत हप्ता भारतसँग शान्ति स्थापना गर्ने सवालमा आफ्नो इच्छुक रहेको बताउँदै कश्मीर मुद्दामा समेत ध्यानाकर्षण गराएका थिए  ।

‘हामी भारत लगायत हाम्रा सबै छिमेकीहरूसँग शान्ति स्थापना गर्न खोज्छौँ । दक्षिण एसियामा दिगो शान्ति र स्थिरता आवश्यक छ, तथापि जम्मु र कश्मीर विवादको भने न्यायसङ्गत र दिगो समाधानमा निर्भर रहन्छ’। सरिफले संयुक्त राष्ट्रसंघ महासभामा उल्लेख गरेका छन् ।

भारत कश्मीरका सम्बन्धमा पुरानो केन्द्र शासित क्षेत्र भारतको अभिन्न अंग हो भन्ने आफ्नो लामो समयदेखि दाबीमा अडिग छ ।

शहबाज शरीफको सरकार आएपछि पाकिस्तानले भारतप्रति मेलमिलापको दृष्टिकोण राखेको देखिन्छ । तर, भारत सरकारले आतंकवाद र वार्ता सँगै नहुने अडान राखेको छ जसले सहज वार्ताबाट समाधान निकाल्न जटिल देखिन्छ ।