१ नम्बर प्रदेशका मुख्यमन्त्री तथा मन्त्रीहरूको सम्पत्ति विवरण सार्वजनिक गरेका छन् ।

प्रदेश सरकारले मुख्यमन्त्री तथा मन्त्रिपरिषद्को कार्यालयको वेबसाइटमार्फत मुख्यमन्त्री र अन्य १३ जना मन्त्रीको सम्पत्ति विवरण सार्वजनिक गरेको हो ।  

सार्वजनिक विवरणअनुसार प्रदेशका मुख्यमन्त्री राजेन्द्र राईसँग विभिन्न बैंकमा ७७ लाख १६ हजार रुपैयाँ छ । उनले तलबभत्ता तथा स्कूलको स्वामित्व हस्तान्तरणबाट रकम कमाएको उल्लेख गरेका छन् ।

पत्नी शोभा पाठक र मुख्यमन्त्री राईका नाममा विभिन्न बैंकमा बचत गरिएको उल्लेख छ । सवारीसाधनमा मोटरसाइकल मात्रै रहेको छ । बा४०प २८३८ नम्बरको मोटरसाइकल १ लाख ५८ हजारमा २०६९ सालमा खरिद गरेको उनले बुझाएको सम्पत्ति विवरणमा उल्लेख छ । 

मोटरसाइकल प्रधानमन्त्रीको वरिष्ठ विज्ञ हुँदा खरिद गरिएको उल्लेख गरिएको छ । माधवकुमार नेपाल प्रधानमन्त्री भएको बेला उनी वरिष्ठ विज्ञका रूपमा नियुक्त भएका थिए ।

प्रदेश सरकारका मन्त्रीहरूमध्ये भूमि व्यवस्था, सहकारी तथा गरीबी निवारण मन्त्री ओमप्रकाश सरावगी सबैभन्दा धनी देखिएका छन् । उनीसँग १०० तोला सुन र १० लाख नगदसहित विभिन्न बैंकमा १ करोड ४० लाख १२ हजार रुपैयाँ छ । सार्वजनिक विवरणअनुसार उनीसँग रहेको जग्गा र विभिन्न उद्योगमा लगानी पनि अरु मन्त्रीभन्दा धेरै छ । उनले आम्दानीको स्रोत व्यापारलाई देखाएका छन् । 

कृषिमन्त्री झलकबहादुर मगरसँग २ तोला सुन र २ लाख ९ हजार रुपैयाँ नगद रहेको छ । उनले पैत्रिक सम्पत्तिबाट शिवसताक्षीमा प्राप्त गरेको १७ कट्ठा जग्गा र आफैंले बिर्तामोडमा खरिद गरेको उल्लेख गरेका छन् । बिर्तामोडमा रहेको जग्गा पत्नी कल्पना कार्कीको नाममा रहेको उल्लेख गरेका छन् । उनको १ तले पक्की घर समेत छ । 

१ नम्बर प्रदेशमा सबैभन्दा बढी समय ईन्द्रबहादुर आङ्बो मन्त्री बने । उनी २ पटक आर्थिक मामिला तथा योजना मन्त्री बनेका छन् । उनले सम्पत्ति विवरणमा २८० वटा बंगुर देखाएका छन् । २ करोड ७८ लाख ऋण लिएको उनले सार्वजनिक गरेको विवरणमा उल्लेख छ । उनले आफ्नो नाममा रहेको बचत ५५ हजार रुपैयाँ मात्रै रहेको उल्लेख गरेका छन् । पत्नी कुमारी लावतीका नाममा ७ लाख बचत रहेको उनले देखाएका छन् । चाँदी २० तोला र सुन १० तोला रहेको उल्लेख छ । 

सडक पूर्वाधार तथा शहरी विकास मन्त्री हिमाल कार्कीले १ हजार २०० बोइलर कुखुरा र १ माउ गाई रहेको उल्लेख छ । आन्तरिक मामिला तथा कानूननमन्त्री केदार कार्कीले २५ तोला सुन र ८ लाख २४ हजार २५५ रुपैयाँ नगद रहेको जनाएका छन् । 

स्वास्थ्यमन्त्री जयराम यादवले भैसी १२ माउ, गाई १२ माउ, पाडापाडी १० वटा, बाच्छाबाच्छी १० वटा र बाख्रा–खसी २० वटा रहेका उल्लेख गरेका छन् । 

पर्यटन तथा संस्कृतिमन्त्री खिनु लङवाले ८ वटा बाख्रा रहेका उल्लेख गरेकी छन् । 

उद्योग, श्रम तथा रोजगार मन्त्री प्रतापप्रकाश हाङगामले २ वटा सुँगुर, ६ वटा बाख्रा र ८ वटा कुखुरा रहेको विवरण पेश गरेका छन् । ३० तोला सुन र ५० तोला चाँदी छोराले यूकेबाट पठाएको उनले पेश गरेको विवरणमा उल्लेख छ ।