बेलायतको वेल्स ब्रेकनमा यही असोज २२ देखि २४ गतेसम्म सञ्चालन भएको सैन्य अभ्यास ‘एक्सरसाइज क्याम्ब्रियन पट्रोल २०२२’ मा नेपाली सेनाको टोलीले रजत पदक प्राप्त गरेको छ । सेनानी बलबहादुर आले नेतृत्वको १० जनाको सेनाको टोलीले उक्त पदक प्राप्त गरेको हो । 

उक्त अभ्यासमा सहभागी हुन नेपाली सेनाको टोली यही असोज ४ गते बेलायततर्फ प्रस्थान गरेको थियो ।  

युद्धकालीन विशेष परिस्थितिहरूको कल्पना गरी शत्रुपक्षको गतिविधिसमेत समेटेर सञ्चालन गरिने यस विश्वस्तरीय सैन्य अभ्यासमा सहभागी हुने टोलीहरूको शारीरिक, सहिष्णुता र पेशागत दक्षताको मूल्यांकन गर्ने गरिन्छ । अत्यन्त कठीन भौगोलिक इलाकामा सञ्चालन हुने यस अभ्यासमा सहभागीहरूले २ दिनभित्रमा हतियार तथा करिब ५० पाउण्ड तौल बराबरको उपकरण एवं बन्दोबस्ती सामग्रीसहित लगभग ५० किलोमिटर दूरी पार गर्नुपर्दछ ।

त्यसक्रममा सहभागी टोलीले लडाइँको तयारी, नक्सा र कम्पासको भरमा उनीहरूले दिन र रातमा गर्ने निर्धारित स्थानहरूसम्मको यात्रा, खोला तथा अन्य अवरोध पार गर्ने क्षमता, खबर संकलन, घाइते–बिरामीको ब्यवस्थापन, विस्फोटक पदार्थहरू पत्ता लगाउने क्षमतालगायत रसायनिक, जैविक र आणविक हतियार प्रहार भएको अवस्थामा अपनाउने सतर्कतासमेतका अनेकन दक्षताहरूको परीक्षण गरिन्छ । 

उक्त अभ्यासमा बेलायती फौजका ८४ र नेपालसमेत अन्य २४ देशका गरी कूल १ सय ११ सैन्य टोलीहरूको सहभागिता रहेको थियो । बेलायतमा सञ्चालन हुने सैनिक प्रतियोगितामा नेपाली सेनाको पेशागत प्रतियोगिताको मर्यादाक्रमको आधारमा गण तथा गुल्मका फौज र बाहिनीबाट छानिएका व्यक्तिहरु सम्मिलित टिम सहभागी हुने गर्दछ । 

सन् १९६० बाट वार्षिक रूपमा सञ्चालन हुँदै आएको उक्त अन्तर्राष्ट्रियस्तरको प्रतियोगितामा नेपाली सेनाले सन् २०१४ बाट भाग लिँदै आइरहेको छ । 

वगतमा विभिन्न अन्तर्राष्ट्रिय खेलकुद प्रतियोगितामा सहभागिता जनाई उत्कृष्ट नतिजा हासिल गर्न नेपाली सेना सफल भइसकेको छ । यसप्रकारको अत्यन्त व्यवसायिक, समर्पित, साहसी र संयमित फौजले मात्र पूरा गर्न सक्ने अभ्यासमा सहभागी हुन शुरू गरेको केही वर्षभित्रै आफूलाई अब्बल प्रमाणित गर्दै आइरहेको नेपाली सेनाले जनाएको छ । यस वर्ष रजत पदक जित्न सफल हुनुले अन्तर्राष्ट्रिय जगतमा नेपाल र नेपाली सेनाको प्रतिष्ठा उच्च हुनुका साथै मित्रराष्ट्र बेलायतलगायत अन्य सहभागी सेनाबीच रहेको मैत्रीपूर्ण सम्बन्ध थप प्रगाढ हुने सेनाले विश्वास लिएको छ ।