नेपाल आयल निगमले पेट्रोलियम पदार्थको मूल्य नघटाउने निर्णय गरेको छ । निगमले शुक्रबार राति जारी गरेको विज्ञप्तिमा पेट्रोलियम पदार्थको आपूर्ति सुचारु राख्न र इण्डियन आयल कर्पोरेशनको बक्यौता एवं सरकारद्वारा उपलब्ध गराइएको ऋणको व्यवस्थापन गर्न अझै चुनौतिपूर्ण अवस्था रहेकोले मूल्य घटेर आएपनि हाललाई  बिक्री मूल्य यथावत् राखिएको उल्लेख गरिएको छ । 

भारतीय आयल निगमले बिहीबार नेपाल आयल निगमलाई पेट्रोल, डिजेल, मट्टितेल र हवाई इन्धनको मूल्य केही घटाएर सूची पठाएको थियो ।  तर, एलपी ग्यासमा भने केही बढेर सूची प्राप्त भएको निगमले जनाएको छ ।  नयाँ मूल्यसूचीअनुसार पछिल्लो १५ दिनमा समग्रमा निगम केही नाफामा रहने अवस्था आएको विज्ञप्तिमा उल्लेख छ । 

नयाँ मूल्यअनुसार हाल एलपी ग्यासमा  २७७.०२ रुपैयाँ प्रतिसिलिण्डर घाटा रहेको छ । तर पेट्रोल, डिजेल, हवाई इन्धन र मट्टितेलमा हुने केही नाफा समेतलाई गणना गर्दा समग्रमा निगमलाई आगामी १५ दिनमा करीब ५८ करोड नाफा हुने प्रक्षेपण गरिएको विज्ञप्तिमा उल्लेख छ । 

अझैपनि इण्डियन आयल कर्पोरेशन  र नेपाल सरकारलाई गरी निगमले २७ अर्ब ऋण तिर्न बाँकी छ  ।