नेपाली कांग्रेसका वरिष्ठ नेता डा. शेखर कोइरालाले प्रत्यक्षतर्फ २३ बाट ५७ सीट जिते पनि कांग्रेसको पपुलर भोट घट्नु चिन्ताको विषय भएको बताएका छन् । माओवादीको जगजगी रहेको बेलामा पनि ३२ प्रतिशत रहेको पपुलर भोट घट्नु गम्भीर विषय भएको उनले बताए । 

मंगलवार विराटनगरमा आयोजित ‘बाटो बिराएको राजनीति’ पुस्तक विमोचान कार्यक्रमलाई सम्बोधन गर्दै कोइरालाले कांग्रेसको शाख घटेको हो कि भनेर चिन्ता व्यक्त गरेका हुन् । ‘राजनीतिलाई बाटो बिराउन दिँदैनौँ । एकढिक्का भएर नेपाली कांग्रेसलाई पुरानै अवस्थामा फर्काउँछौँ । विगतमा २३ सिट जितेको कांग्रेस ५७ त आयो, तर ७ प्रतिशत पपुलर भोट किन कम भयो ? यसबारे हामी गम्भीर हुन जरुरी छ’, कोइालाले भने, ‘माओवादीको जगजगीको बेला पनि ३२ प्रतिशत आएको थियो । अहिले २५ प्रतिशतमा झर्दा कांग्रेसका शाख घटेको हो कि ?’

कोइरालाले ‘बाटो बिराएको राजनीति’ विराटनगरमा विमोचन हुनु गौरवको विषय भएको बताए । ‘विराटनगरलाई राजनीतिक राजधानीको रूपमा विपीले स्थापित गर्नुभयो र गिरिजाले सिंचित गरेर अगाडि बढाउनु भयो । गुरुराज घिमिरेले निर्वाचनलगत्तै पुस्तक लोकार्पण गरेर विराटनगरलाई पुरानै राजनीतिको राजधानीको रूपमा स्थापित गराउनु भयो’, कोइरालाले भने ।  

लोकान्तर डट्कममा प्रकाशित लेखहरूको संग्रह ‘बाटो बिराएको राजनीति’ लोकान्तर सञ्चार प्रालिले प्रकाशित गरेको हो ।