नेपाली कांग्रेस संसदीय दलको नेताका लागि सभापति शेरबहादुर देउवा र महामन्त्री गगन थापाबीच प्रतिष्पर्धा हुने भएको छ । बुधवार हुने निर्वाचनका लागि उनीहरू दुवैजनाले मंगलवार सिंहदरबारस्थित कांग्रेस संसदीय दलको कार्यालयमा पुगेर उम्मेदवारी दर्ता गराए । 

महामन्त्री गगन मंगलवार दिउँसो पौने ३ बजे उम्मेदवारी दर्ता गराउन संसदीय दलको कार्यालय पुगेका थिए । गगन पुगेको केहीबेरमै सभापति देउवा पनि उम्मेदवारी दर्ता गराउन पुगेका थिए । 

शेखर कोइरालाको प्रस्ताव तथा धनराज गुरुङ, विश्वप्रकाश शर्मा र प्रदीप पौडेलको समर्थनमा गगनले संसदीय दलको नेताका लागि उम्मेदवारी दर्ता गराए । उम्मेदवारी दर्ता गराउन कोइराला पनि सिंहदरबार पुगेका थिए । 

देउवाको प्रस्तावकमा रामचन्द्र पौडेल र समर्थकमा उपसभापति पूर्णबहादुर खड्का रहेका छन् । यसअघि पौडेल आफै संसदीय दलको नेतामा आकांक्षी थिए । तर, अन्तिम समयमा देउवाले पौडेललाई पछि हटाएर प्रस्तावक बनाएका हुन् । 

कांग्रेस संसदीय दलको नेताको चुनावमा बुधवार बिहान ८ बजेका लागि तोकिएको छ ।