नेपाली कांग्रेसका महामन्त्री गगन थापाले पार्टीलाई गतिशील बनाउन निरन्तर प्रयत्नशील रहने भन्दै संसदीय दलको निर्वाचनसँगै यो अभियान प्रारम्भ भएको बताएका छन् । 
‘निश्चय नै पार्टी गतिशील भइदियोस् भन्ने आम चाहना अनुरुप किन अपेक्षित परिणाम आउन सकेन भन्ने विषयमा समीक्षा गर्दै नयाँ ढङ्गले पार्टीलाई गतिशील बनाउन हामी निरन्तर प्रयत्नशील रहने छौं’, थापाले सामाजिक सञ्जालमार्फत भनेका छन्, ‘यो अन्त्य होइन प्रारम्भ हो । पार्टी रुपान्तरण र सुदृढीकरणको यात्रा प्रारम्भ भइसकेको छ । यो निर्वाचनले त्यो यात्रामा थप गति दिएको छ, बल पुर्‍याएको छ।’

थापाले अत्यन्त सौहार्दपूर्ण ढङ्गले सम्पन्न  संसदीय दलको निर्वाचनले पार्टीको आन्तरिक लोकतान्त्रिक अभ्यास र प्रक्रियालाई थप सुदृढ बनाएको बताएका छन् । आन्तरिक निर्वाचनको यो परिणामलाई लिएर विभिन्न अनुमानका भरमा विश्लेषण गर्नु र नकारात्मक टिप्पणी गर्नु उचित नहुने पनि थापाको भनाइ छ ।