नेपाली सेनाको प्रवक्ताको जिम्मेवारी सहायकरथी कृष्णप्रसाद भण्डारीले बुधवारदेखि सम्हालेका छन् ।

झापा चारआलीस्थित २१ बाहिनीपतिको जिम्मेवारी पूरा गरेका उनलाई सेनाले सैनिक जनसम्पर्क तथा सूचना निर्देशनालयको प्रमुखमा ल्याएको हो ।

१ वर्षअघि प्रवक्तामा नियुक्त भएका निवर्तमान प्रवक्ता नारायण सिल्वालले उनलाई कमाण्ड बरबुझारथ गरी जिम्मेवारी हस्तान्तरण गरे । जनसम्पर्क तथा सूचना निर्देशनालयद्वारा बुधवार आयोजित कार्यक्रममा उनले सेना र सञ्चार क्षेत्रको कार्य जिम्मेवारी फरक भए पनि दुवैको उद्देश्य राष्ट्र र राष्ट्रवासीको कल्याणको खातिर रहेको बताए ।

उनले भने, ‘सेना र सञ्चारमाध्यमबीचको सम्बन्ध थप प्रगाढ तुल्याउन र सेनाले गरेका काम कारबाहीलाई समयमै सूचना उपलब्ध गराई उद्देश्यअनुरूप निर्देशनालयले काम गर्दैआएको छ ।’

निवर्तमान प्रवक्ता सिल्वालले राज्यको चौथो अंगका रूपमा रहेकोे प्रेस जगको निष्पक्ष र वस्तुगत रिपोर्टिङ सेनालाई आफ्नो कर्तव्यपथमा निर्भिक र जिम्मेवार भएर अघि बढ्न तथा संगठनलाई मर्यादा र कर्तव्यबाट विचलित हुन नदिने विश्वास व्यक्त गरेका छन् ।