कर्णाली सभ्यता र संस्कृतिमा समृद्ध छ : राष्ट्रपति

राष्ट्रपति विद्यादेवी भण्डारीले कर्णाली सभ्यता र संस्कृतिमा समृद्ध रहेको बताएकी छन् ।

कर्णाली कलाकार समाज र कनका सुन्दरी फिल्म्सले संयुक्त रूपमा मंगलवार आयोजना गरेको ‘रारा राष्ट्रिय म्युजिक अवार्ड २०७९’को उद्घाटन गर्दै उनले आधुनिक, भौतिक र पूर्वाधार विकासका दृष्टिले कर्णाली पछि परे पनि सभ्यता र संस्कृतिमा समृद्ध रहेको बताइन् ।

कर्णाली कला, संस्कृतिको संरक्षण र सम्वर्द्धन गर्ने उद्देश्यले स्रष्टालाई सम्मान गरेकोमा आफूलाई खुशी लागेको समेत उनले बताइन् । गुणस्तरीय शिक्षामार्फत दक्ष जनशक्ति उत्पादन गरी कर्णालीमा रहेको प्राकृतिक स्रोत र साधन सदुपयोग गर्नसके सामाजिक तथा आर्थिक रूपमा समेत कर्णाली क्षेत्रलाई माथि उठाउन सकिने उनको भनाइ थियो । 

राष्ट्रपति भण्डारीले प्राकृतिक सुन्दरता र विविधतायुक्त संस्कृतिमा आधारित पर्यटन प्रवर्द्धनको ठोस योजना तथा कार्यक्रम अगाडि सारेर यसको कार्यान्वयन गर्न सके आर्थिक विकासमा फड्को मार्न सकिने धारणा व्यक्त गरिन् । उनले कर्णाली क्षेत्रले समग्र नेपालको कला र संस्कृतिमा पुर्‍याएको योगदानलाई आजको यस कार्यक्रमले उजागर गर्न मद्दत पुर्‍याएको बताइन् ।

‘आजको यस कार्यक्रमले हाम्रो मौलिक कला, संगीत र संस्कृतिको संरक्षण तथा सम्वर्द्धनका लागि कलाकार तथा स्रष्टाहरूलाई उत्साहित बनाउँदै अग्रसर हुन थप प्रेरणा प्रदान गर्न सहयोग मिल्ने विश्वास गर्दछु,’ उनले भनिन् ।

उनले कर्णालीको सिञ्जा उपत्यकालाई नेपाली भाषाको उद्गमस्थलका रूपमा मानिएको भन्दै संस्कृतिविद् सत्यमोहन जोशीको संलग्नतामा कर्णाली क्षेत्रको समाज, जीवन र संस्कृति समेतको अध्ययनमा कर्णालीको लोक संस्कृति प्रकाशनमा आएपछि यस क्षेत्रको विशिष्टताबारे थप परिचित हुने मौका मिलेको बताइन् ।