मधेश प्रदेशमा चालू आर्थिक वर्ष २०७९/८० को ६ महिनामा १ लाख ४६ हजारभन्दा बढी सवारीसाधन कारबाहीमा परेका छन् । 

सवारी दुर्घटना न्यूनीकरण गर्न प्रदेशका जिल्लामा विशेष अभियान चलाएको ट्राफिक प्रहरीले विभिन्न कसूरमा १ लाख ४६ हजार १८० वटा सवारीसाधनमाथि कारबाही गरेको हो ।

सवारीसाधन माथिको कारबाहीबाट १० करोड ७७ लाख १५ हजार ५०० रुपैयाँ राजस्व संकलन भएको मधेश प्रदेश ट्राफिक कार्यालय पथलैया बाराले जानकारी दिएको छ । 

ट्राफिक प्रहरीले हाल राजमार्गमा जडान गरिएको सीसीटीभी र राडर स्पिड गनबाट सवारीसाधनको गति निगरानी गरिरहेको छ । कार्यालय पथलैया बाराका अनुसार तीव्र गतिमा चलाइएको कार/जीप २ हजार ६६४ वटा सवारीसाधन कारबाहीमा परेका छन् । 

यात्रुबाहक बस, मिनिबस र सुमो ८२१ वटा, मोटरसाइकल ३४९ वटा र मालबाहक ट्रिपर, ट्रक र ट्रयाक्टर ३२५ वटा गरी ४ हजार १४९ वटा सवारीसाधनमाथि कारबाहीमा परेको कार्यालय प्रमुख प्रहरी उपरीक्षक सन्तोषकुमार भट्टराईले जानकारी दिए ।
    
क्षमताभन्दा बढी यात्रु बोक्ने, तीव्र गतिमा सवारी चलाउने, विना हेलमेट र ३ जना सवार भई मोटरसाइकल चलाउने प्रवृत्ति बढेकाले राजमार्ग तथा अन्य सहायक मार्गमा सवारी चेकजाँच कडाइ गरिएको उनको भनाइ छ ।