बेलायतले अमेरिका र अस्ट्रेलियासँग गरेको अकस सम्झौतालाई नेटो जस्तै विस्तार गर्न चाहेको छ । 

हिन्द-प्रशान्त क्षेत्रको सुरक्षा सुनिश्चित गर्नका लागि यस संगठनलाई विस्तार गर्नुपर्ने बेलायतको सोच हो । त्यसक्रममा उसले भारत र जापानलाई पनि यसमा जोड्न खोजेको छ । 

बेलायतको रक्षा समितिले अकसमा भारत र जापानलाई जोड्न प्रस्ताव गरेको हो । 

तर भारत यसमा जोडिने विषयमा शंका छ । अकस सम्झौतापछि अस्ट्रेलियाले फ्रान्ससँगको पनडुब्बी सम्झौता रद्द गरेको थियो । त्यसले फ्रान्सलाई आक्रोशित बनाएको थियो । 

फ्रान्स र भारतबीच सुमधुर सम्झौता भएकाले भारत अकसमा जोडिन हिचकिचाउने सम्भावना छ । भारतलाई फ्रान्सले विभिन्न सैन्य उपकरणहरू उपलब्ध गराइरहेको छ । त्यसैले विशेषज्ञहरू अकसका लागि भारतले फ्रान्सलाई असन्तुष्ट नबनाउने बताइरहेका छन् । 

त्यसमाथि भारत क्वाडको सदस्य छँदैछ । त्यसमा जापान, अस्ट्रेलिया र अमेरिका पनि छन् । हिन्द प्रशान्त क्षेत्रलाई नै विचार गरेर उक्त समूह बनाइएको हो । त्यसैले त्यही क्षेत्र हेर्ने अकसमा भारत जोडिने विषयमा विशेषज्ञहरूले शंका व्यक्त गरेका हुन् ।