राष्ट्रिय सभाको सोमवारको बैठकले ‘अनुगमन तथा मूल्यांकन विधेयक २०७६’लाई सर्वसम्मतिले पारित गरेको छ ।

प्रधानमन्त्री पुष्पकमल दाहाल ‘प्रचण्ड’का तर्फबाट सञ्चार तथा सूचना प्रविधिमन्त्री रेखा शर्माले विधायन व्यवस्थापन समितिको प्रतिवेदनसहित सो विधेयकमाथि छलफल गरियोस् भन्ने प्रस्ताव प्रस्तुत गरेकी थिइन् ।

प्रस्तावमाथि सांसद खिमलाल देवकोटाले यो विधेयक सकारात्मक रहेको बताउँदै स्थानीय र प्रदेश सरकारको भूमिका समेत यसमा स्पष्ट हुनुपर्ने बताए । उनले सबै प्रकारका आयोजनालाई प्रभावकारी बनाउन ३ वटै तहका सरकारका तर्फबाट अनुगमन गर्ने व्यवस्था गर्नुपर्ने र विधेयकमा यससम्बन्धी प्रावधान राख्नुपर्नेमा जोड दिए ।

सांसद देवकोटाले उठाएको जिज्ञासाको जवाफ दिँदै मन्त्री शर्माले विकास आयोजनाको प्रभावकारी अनुमगन र मूल्यांकन हुन नसक्दा अपेक्षित लाभ हुन नसकेका सन्दर्भमा आमचासोलाई सम्बोधन गर्दै सरकारले विधेयकलाई अगाडि बढाएको बताए ।

बैठकले ‘अभिलेख संरक्षण (पहिलो संशोधन) विधेयक २०७७’ सर्वसहमतिले पारित गरेको छ । संस्कृति, पर्यटन तथा नागरिक उड्डयनमन्त्री सुदन किराँतीको तर्फबाट मन्त्री शर्माले सो विधेयक पारित गरियोस् भन्ने प्रस्ताव पेश गरेका थिए ।

सोमवारको बैठकले ‘खाद्य स्वच्छता तथा गुणस्तर विधेयक २०७७’ सर्वमम्मतिले पारित गरेको छ । कृषि तथा पशुपन्छी विकासमन्त्री ज्वालाकुमारी साहले विधायन व्यवस्थापन समितिको प्रतिवेदनसहित विधेयक पारित गरियोस् भन्ने प्रस्ताव पेश गरेका थिए ।

राष्ट्रिय सभाको अर्को बैठक माघ २७ गते शुक्रवार ५ बजे बस्नेछ ।