विशिष्ट व्यक्तिहरू आउँदा विराटनगर विमानस्थलको भीआईपी कक्ष भरिभराउ हुन्छ ।

विमानस्थलको बाहिर-भित्र खुट्टा राख्ने ठाउँ पाउन पनि मुस्किल हुन्छ । फूलमाला खादाको पनि ओइरो नै लाग्छ । स्वागतका लागि नेता तथा मन्त्रीहरूको घाँटीले थेग्न नसक्ने गरी माला खादाहरू लिएर जाने गरिन्छ । फूलको बुकेहरू लिएर जानेको पनि कमी हुँदैन । 

तर सोमबार भने विराटनगर विमानस्थलमा भीआईपी आउँदा भने पहिलाजस्तो देखिएन ।​

भीआईपीलाई स्वागत गर्न गएकाहरूका खाली हात गएका थिए। उनीहरूका हातमा न त खादा नै थियो न त माला न त बुके । विमानस्थलको भीआईपी कक्षमा भीड पनि थिएन । पत्रकार र केही कर्मचारी मात्रै त्यहाँ थिए । 
संस्कृति, पर्यटन तथा नागरिक उड्डयन मन्त्री सुदन किराती टर्मिनल भवनको शिलान्यास गर्न सोमबार विराटनगर आउँदाको दृश्य हो यो।

उनलाई स्वागत गर्न विराटनगर विमानस्थलका कर्मचारी, प्रमुख जिल्ला अधिकारी तीर्थराज भट्टराईलगायत सुरक्षा निकायका प्रमुखहरू मात्रै भेला भएका थिए । 

त्यहाँ माओवादी कार्यकर्ताहरू पनि गएका थिएनन्। उनले माओवादी नेता तथा कार्यकर्ताहरूलाई पाटी कार्यालयमा छुट्टै भेटेका थिए । उनले मन्त्री हुनेबित्तिकै भेट्न आउनेलाई खादा नल्याउन भनेका थिए । 

स्वागतका लागि गएका कर्मचारीसँग मन्त्री किरातीले  हात मिलाएर भीआईपी कक्षमा गएका थिए ।  उनले सो कक्षमा भने केहीबेर पत्रकारहरूसँग भेटेका थिए।

अन्य भीआईपी आउँदाभन्दा फरक देखिएपछि उनलाई पत्रकारहरूले फरक प्रश्नसमेत सोधेका थिए ।

अहिलेको मन्त्रिमण्डलमा तपाईं सक्रिय पनि हुनुहुन्छ । सामाजिक सञ्जाल तथा कामको हिसाबले पनि । तपाईंको सक्रियता हो कि स्टन्ड ? पत्रकारले उनलाई प्रश्न गरेका थिए।

मन्त्री किरातीले रचनात्मक काम गर्दा स्टन्ड ? भन्ने जवाफ दिएका थिए । ‘देशमा केही काम भएको छैन,’ उनले भने ‘आफ्नो जिम्मेवारी पूरा गर्दा स्टन्ड भनेर भन्छन् ।’ 

‘अर्बौं लगानी गरेर बनाइएको विमानस्थल कर्मचारीहरूलाई घाम ताप्न होइन।  १५ घण्टाबढी जहाज चल्नुपर्छ भन्ने मेरो मान्यता छ । संस्थान नाफामा जानुपर्छ, म घाटा भएको टुलुटुलु हेरेर त्यो कुर्सीमा बस्न सक्दिनँ’, उनले भने।

आफनै निर्वाचन क्षेत्रको कार्यक्रम छाडेर प्रदेशका मन्त्रीवनभोजमा 

शिलान्यास कार्यक्रममा प्रदेश १ पर्यटन, वन तथा वातावरण मन्त्री जीवन आचार्य भने थिएनन्।

माओवादी अध्यक्षसमेत रहेका प्रधानमन्त्री पुष्पकमल दाहाल प्रचण्डका ज्वाइँसमेत रहेका मन्त्री आचार्य भने आफ्नै निर्वाचन क्षेत्रको कार्यक्रम छाडेर वनभोजमा गएका छन् ।

झापाको दोमुखामा पूर्वजनमुक्ति सेनाले जनयुद्ध दिवसका अवसरमा गरेको वनभोज कार्यक्रममा मन्त्री आचार्य गएका हुन् ।

उनी मोरङ क्षेत्र नम्बर ६ 'क' बाट निर्वाचित भएका थिए ।

विराटनगर विमानस्थल पनि सोही क्षेत्रमा पर्छ । नेताहरूसँगै सल्लाह गरेर मन्त्री वनभोज कार्यक्रममा गएका आचार्यका प्रमुख स्वकीय सचिव ईश्वरी आचार्यले बताए ।