लोत्से मलबाट लुटिएका मोबाइल नचल्ने, प्राधिकरणले 'ब्लक' गरिदिन सक्ने

बालाजुको लोत्से मलबाट सोमवार करीब ८ करोड रुपैयाँ बराबरको मोबाइल लुटिएको छ ।

यातायात मजदुरले अनियन्त्रित आन्दोलन गरिरहेका बेला एक भीडले मोबाइल पसलमा पुगेर मोबाइल लुटेको थियो । सोमवार लुटिएको मोबाइल करीब ८ करोड रुपैयाँका थिए भने सबै मोबाइल आयात हुँदै इन्टरनेसनल मोबाइल इक्युपमेन्ट आइडेन्टिटी (आईएमईआई) नम्बर दर्ता भएका छन् ।

लुटिएका सबै मोबाइलको आईएमईआई दर्ता भएको र त्यसको रेकर्ड आफूसँग भएको व्यवसायी अर्जुन चालिसेले बताए । उनका अनुसार कति वटा मोबाइल लुटिएको भन्ने विषयमा तथ्यांक संकलन गर्ने काम भइरहेको छ, ८ करोड रुपैयाँ बराबरका मोबाइल लुटिएकाले औसतमा ३२ हजार रुपैयाँका दरले पनि २५ सय वटा मोबाइल लुटिएको हुनसक्छ ।

फरक दरका मोबाइल भएकाले कति वटा र कति रकमका भन्ने विषयमा तथ्यांक संकलन गर्ने र तथ्यांक नेपाल दूरसञ्चार प्राधिकरणलाई जानकारी दिने पनि चालिसेले बताए ।

‘बसपार्कबाट लुटिएको मोबाइलको आईएमईआई नम्बर अनलाइनबाट दर्ता भयो भने मात्रै हामीले ट्याक गर्न सक्छौं,’ नेपाल दूरसञ्चार प्राधिकरणका निर्देशक सुरेन्द्रलाल हाडाले भने । उनका अनुसार व्यवसायीले लुटिएका मोबाइलबारे जानकारी दिए भने सबै मोबाइल ‘ट्याक’ गर्न सकिन्छ । ती मोबाइल सबैको आईएमईआई नम्बर दर्ता भएकाले सबै मोबाइल कहिल्यै नचल्ने गरी ‘ब्लक’ गर्न पनि सकिने प्राधिकरणले जानकारी दिएको छ ।

प्राधिकरणले गत भदौ ३० गतेबाटै मोबाइल डिभाइस म्यानेजमेन्ट सिस्टम (एमडीएमएस) लागू गरेको छ । यस्तो सिस्टम औपचारिक रूपमा सरकारले कार्यान्वयन नगर्न आदेश दिएकाले स्थगित मात्रै भएको तर प्राधिकरणले सबै मोबाइललाई ट्याक भने गर्न सक्छ ।
 
लुटिएका सबै मोबाइल आईएमआई नम्बर दर्ताकै भरमा एमडीएमएस प्रणालीको माध्यमबाट कहिले नचल्ने गरी ब्लक गर्न पनि सकिन्छ । व्यवसायीले उपलब्ध गराउने तथ्यांकका आधारमा सबै लुटिएका मोबाइल ट्याक गर्न सकिने भएकाले फिर्ता गर्नु नै उपयुक्त हुने प्राधिकरणका एक अधिकारीले बताए । ती अधिकारीले भने, ‘फिर्ता नगर्ने र कसैले प्रयोग गरेको अवस्थामा मोबाइलको लोकेसन ट्याकमार्फत पत्ता लाग्ने र थप कारवाही पनि हुन्छ । यस्ता लुटिएका मोबाइल ट्याकबाट भेटिएपछि चोरीको केसमा थप कारवाही पनि हुन सक्छ ।’