इन्डियन प्रिमियर लिग (आईपीएल) को १६ औं सिजनको खेल तालिका सार्वजनिक भएको छ ।

भारतीय क्रिकेट कन्ट्रोल बोर्ड (बीसीसीआई) ले आज (शुक्रबार) सार्वजनिक गरेको तालिकाअनुसार पहिलो खेल डिफेन्डिङ च्याम्पियन गुजरात टाइटन्स र चार पटकको च्याम्पियन चेन्नई सुपर किंग्सबीच मार्च ३१ मा खेल हुनेछ

युवा स्टार हार्दिक पाण्ड्याले पहिलो खेलमा अनुभवी महेन्द्र सिंह धोनीको चुनौती सामना गर्नेछन्। फाइनल खेल मे २८ मा हुने भएको छ ।

उद्घाटन र फाइनल दुवै खेल अहमदाबादको नरेन्द्र मोदी स्टेडियममा हुनेछन्।

५२ दिनमा १० टोलीबीच ७० वटा लिग खेल हुनेछन् । त्यसपछि चार प्लेअफ खेल हुनेछन् । 

यसरी प्रतियोगितामा कुल ७४ खेल हुनेछन् ।

त्यहाँ १८ डबल हेडरहरू (एक दिनमा दुई खेलहरू) हुनेछन्। सबै खेलहरू देशभरका १२ वटा मैदानमा हुनेछन् । लिग चरणमा एक टोलीले आफ्नो घरेलु मैदानमा ७ खेल र विपक्षी टोलीको मैदानमा सात खेल खेल्नेछन् ।

पछिल्लो पटक फाइनलमा राजस्थान रोयल्सलाई हराउँदै गुजरात टाइटन्सले उपाधि जितेको थियो । उसले सहभागिता जनाएको पहिलो पटकमै उपाधि जितेको हो।

यसपटकको आईपीएल चेन्नई सुपर किंग्सका कप्तान महेन्द्र सिंह धोनीका लागि अन्तिम हुनसक्ने मानिएको छ।

४१ वर्षीय धोनीले सन् २०२० मा नै अन्तर्राष्ट्रिय क्रिकेटबाट संन्यास लिइसकेका छन्।

२०१९ पछि आईपीएल पहिलो पटक सबै टिमको घरेलु मैदानमा खेलाइनेछ ।

कोरोना भाइरस महामारीका कारण सन् २०२० मा यूएईमा प्रतियोगिता आयोजना भएको थियो ।

२०२१ मा भने भारतका केही मैदानमा खेलहरू खेलाइएको थियो, तर कोरोना महामारीका कारण बीचमै रोकेर पुनः यूएईमा सम्पन्न गरिएको थियो।

२०२२ मा प्रतियोगिता पूरै भारतमा खेलिएको थियो, तर मुम्बई-पुनेमा लिग खेलहरू र अहमदाबाद-कोलाकटमा प्लेअफ खेलहरू भएका थिए।