पर्सासहित तराई मधेशका जिल्लामा बिहीवार रंगैरंगको पर्व फागु अर्थात् होली पर्व मनाइँदैछ ।

तिथिमा घटबढका कारण हिजो तराई मधेशमा मनाउनुपर्ने होली बिहीवार मनाउन लागिएको हो । 

कतिपयले भने आफ्नो इच्छाअनुसार बुधवारै होली मनाए पनि अधिकांशले बिहीवार मनाउन लागेका छन् । तराई मधेशमा यस वर्ष पनि ३ दिन नै होली मनाइने भएको छ ।

तराई मधेशमा होलिका दहन मंगलवार बिहानै सम्पन्न भए पनि तिथिमा घटबढका कारण होली बिहीवार मात्र मनाइने वीरगञ्जका स्थानीय लक्ष्मण साहले बताए ।

मंगलवार बेलुका ५ बजेपछि मात्रै एकम अर्थात् प्रतिपदा शुरू हुने भएकाले बुधवार होली पर्व मनाउन लागेको उनको भनाइ छ तर कतिपयले भने मंगलबार माछामासु बार्ने चलन रहेकाले बुधवार मात्रै होली खेल्ने तर्क गरेका छन् । 

मंगलवार बारेको कारणले भन्दा पनि प्रतिपदा तिथि ढिलो गरी शुरू हुने भएकाले १ दिन ढिलो होली मनाउन लागेको साहको कथन छ । होली पर्वका अवसरमा वीरगञ्जको विभिन्न स्थानमा बुधवार सांस्कृतिक कार्यक्रम तथा कन्सर्टको आयोजना गरिएको छ ।