३ चैतमा हुने उपराष्ट्रपतिको निर्वाचनका लागि ३ दलबाट ४ नेताको उम्मेदवारी कायम भएको छ ।

निर्वाचन अधिकृतको कार्यालयले आइतबार सवा ४ बजे प्रकाशित गरेको अन्तिम नामावलीमा ४ जना उम्मेदवार कायम रहेको जनाएको छ । 

जसमा एमालेबाट अष्टलक्ष्मी शाक्य, जसपाबाट रामसहायप्रसाद यादव र प्रमिला कुमारी छन् ।

यस्तै जनमत पार्टीबाट ममता झाको नाम उम्मेदवारको अन्तिम सूचीमा प्रकाशित भएको हो । 

यी उम्मेदवारमा सत्ता शाक्यबाहेक सत्ता गठबन्धनबाटै ३ जना उम्मेदवार बनेका हुन् । जसमा जसपाबाटै एक पुरुष र एक महिला उम्मेदवार बनेका छन् । 

जसपाका उम्मेदवार रामसहायप्रसाद यादवविरुद्ध उजुरी परे पनि निर्वाचन अधिकृतले उजुरीलाई खारेज गर्दै उनको उम्मेदवारी कायम गरेको हो । 

तर पनि सत्ता गठबन्धनले उम्मेदवार दिने समयभित्र बाँकी २ जनाको उम्मेदवारी फिर्ता लिएनन् । 

निर्वाचन अधिकृतको कार्यालयले जसपाका उम्मेदवार रामसहायको उम्मेदवारी कायम राखे पनि सत्ता गठबन्धन दल अझै पनि संशयमा देखिएका छन् ।

किनकि निर्वाचन आयोगले राष्ट्रपति पुरुष भएपछि फरक लिंगका आधारमा महिला उपराष्ट्रपति हुनुपर्ने आशय व्यक्त गरेपछि अन्योल भएको थियो ।

यही अन्योलबीच सत्ता गठबन्धनबाट ३ जनाको उम्मेदवारी परेको हो ।

निर्वाचन अधिकृतले नरोके पनि उपराष्ट्रपतिमा चुनाव हुने ३ चैतसम्म मुद्दा पर्न सक्ने देखिएपछि गठबन्धन दलले उम्मेदवारी फिर्ता नलिएको देखिन्छ ।

मतदान हुने दिनसम्म रामसहायविरुद्ध मुद्दा नपरे प्रमिलाको उम्मेदवारी अन्तिम अवस्थामा निष्क्रिय गराउने तयारी छ । तर जनमतले भने ममता झाको उम्मेदवारी फिर्ता नलिने बताएको छ ।