चिनियाँ तथा नेपाली याप निर्माताहहरूले ऋण दिने याप डाउनलोड गर्न लगाएर भारतीयहरूलाई ठगिरहेको त्यहाँको प्रहरीले जनाएको भन्दै द टाइम्स अफ इन्डियाले खबर दिएको छ । 

आर्थिक अभावका कारण समस्यामा परेका मानिसलाई एउटा याप डाउनलोड गर्न लगाई अन्लाइन फारम भर्न लगाइने गरेको छ । अनि त्यसको आधारमा क्लायन्टको फोनमा प्रवेश गरी व्यक्तिगत डेटाहरू चोरेर मानिसबाट पैसा धुत्ने गरिएको छ । 

सन् २०२२ मा मात्र भारतको गुजरात प्रहरीले त्यस्ता किसिमका ८८५ वटा याप पत्ता लगाएको थियो । अनि एन्ड्रोइडबाट ४१९ वटा याप हटाएको थियो । 

साइबरक्राइम हेल्पलाइनमा दर्ता गरिएका ९३२ वटा उजुरीका आधारमा प्रहरीले यी आपको पहिचान गरेको हो । प्रहरीका अनुसार, चिनियाँ र नेपाली निर्माताहरूले यी याप बनाएर चीन वा हङकङका सर्भरमा तिनलाई होस्ट गर्ने गरेका छन् । 

साइबर ठगहरूले मानिसलाई सन्देश पठाएर सानो ऋण चाहिएमा मोबाइल याप डाउनलोड गर्न भन्ने गरेका छन् । मोबाइल प्रयोगकर्ताले ऋण पाउनका लागि यापलाई आफ्नो कन्ट्याक्ट, तस्वीर, भिडियो र अन्य डिजिटल सामग्रीमा पहुँच दिन अनुमति दिनुपर्ने हुन्छ ।

त्यसपछि मोबाइल प्रयोगकर्ताको डेटा उपयोग गरी उनीहरूसँग ठगले पैसा धुत्ने गरेका थिए । प्रयोगकर्ताको तस्वीर वा भिडियोलाई अश्लील रूपमा सम्पादन गरेर पैसा धुत्ने काम भएको थियो । अनि प्रयोगकर्ताको कन्ट्याक्टमा रहेका व्यक्तिलाई उक्त आपत्तिजनक भिडियो वा तस्वीर पठाउने धम्की दिइयो । 

कोभिडको बेलामा जागिर गएका वा तलब घटेका मानिसलाई पैसाको चरम आवश्यकता परेको स्थितिमा साइबर ठगहरूले धेरैलाई शिकार बनाए ।