उपप्रधानमन्त्री तथा गृहमन्त्री नारायणकाजी श्रेष्ठले कारागारलाई सुधार गृहका रूपमा विकास गर्नुपर्ने बताएका छन्। बिहीबार कारागार व्यवस्थापन विभाग अवलोकन लगत्तै विभागका अधिकारीहरूको ब्रिफिङ सुनेपछि उपप्रधानमन्त्री श्रेष्ठले उक्त कुरा बताएका हुन् । 

'कारागारलाई सुधार गृहका रूपमा सञ्चालन गर्नुपर्छ भन्ने मान्यतालाई हामीले स्थापित गर्नुछ । त्यो अनुकूल वातावरण बनाउनु छ,' उपप्रधानमन्त्री श्रेष्ठले भने, 'त्यसमा हामीले गृहकार्य गर्नुपर्ने आवश्यकता छ ।'

बजेटलगायतका कारण उक्त कार्यका लागि सरकारका पनि केही सीमाहरू भएको बताए। तर, साँच्चिकै सुधार गृह बनाउने काममा योजना बनाएर लाग्नुपर्ने र त्यसमा आफू प्रतिबद्ध रहेको उनको भनाइ छ ।
एकातर्फ सीमित स्रोतसाधनका बाबजुद धेरै कैदीबन्दीको व्यवस्थापन गर्नुपर्ने चुनौतीपूर्ण जिम्मेवारी रहेको र अर्कातर्फ त्यहाँ भित्रैका नाइकेहरूको अनावश्यक दबाबको कुरा पनि आफूले सुनेको श्रेष्ठले बताए ।
नीति र विधि छाडेर अनावश्यक दबाबमा आफूले काम नगर्ने श्रेष्ठको भनाइ थियो । 'अनावश्यक दबाब हामी झेल्छौँ । मैले झेल्छु,' श्रेष्ठले भने, तपाईंहरु सुधारको दिशामा लाग्नुस् ।'

यथास्थितिमा जस्तो चलिरहेको छ त्यस्तै चलिरहोस् भनेर अब नहुने श्रेष्ठले बताए । अब विकृति र खराब कार्यहरूमा व्यापक परिवर्तन आवश्यक रहेको उनको भनाइ छ ।
ब्रिफिङका क्रममा विभागका अधिकारीहरूले सीमित स्रोतसाधनका बाबजुद धेरैको व्यवस्थापन गर्नुपरेको भन्दै क्षमताभन्दा बढी कैदी बन्दी समेत राख्नुपरेको गुनासो गरेका थिए । त्यस्तै भौतिक पूर्वाधार तथा बजेट लगायतका कारण पनि आफूहरूलाई व्यवस्थापनमा समस्या भइरहेको उनीहरूले बताएका थिए ।