गोरखा जिल्लामा ८८ हजारभन्दा बढी नागरिकले स्वास्थ्य बिमामा आवद्ध भएका छन् । 

विक्रम संवत् २०७४ असारबाट जिल्लामा स्वास्थ्य बिमा कार्यक्रम शुरूआत भएको थियो ।  

स्वास्थ्य बिमा बोर्ड कार्यालय गोरखाका प्रमुख विशाल लौडारीका अनुसार ११ स्थानीय तह रहेको जिल्लाभित्र स्वास्थ्य बिमा गराउनेको संख्या गोरखा नगरपालिकामा सबैभन्दा धेरै रहेका छन् ।

‘११ स्थानीय तहमध्ये गोरखा नगरपालिकाभित्र सबैभन्दा धेरैले स्वास्थ्य बिमा गराएका छन्,’ उनले भने, ‘नगरपालिकामा अहिलेसम्म २१ हजार ७१८ जनाले स्वास्थ्य बिमा गराइसकेका छन् ।’

उनले जिल्लाको चुमनुब्री गाउँपालिकामा स्वास्थ्य बिमा गराउनेको संख्या सबैभन्दा न्यून रहेको जानकारी दिए । ‘चुमनुब्री गाउँपालिकामा अहिलेसम्म ७७४ जनामा मात्र स्वास्थ्य बिमाको पहुँचमा रहेको छ,’ प्रमुख लौडारीले भने । 

उनका अनुसार पालुङटार नगरपालिकाभित्रका १६ हजार १५१ जनाले स्वास्थ्य बिमा गराएका छन् भने सिरानचोक गाउँपालिकाका ९ हजार ९४२ जनाले अहिलेसम्म स्वास्थ्य बिमा गराएका छन् ।

प्रमुख लौडारीले स्वास्थ्य बिमा गराउनेमा आरुघाट गाउँपालिकाका ८ हजार ३३४, भीमसेन थापा गाउँपालिकाका ७ हजार ८४८, अजिरकोट गाउँपालिकाका २ हजार ४१३, बारपाक सुलिकोट गाउँपालिकाभित्रका ६ हजार, गण्डकी गाउँपालिकाका ५ हजार ३१० र धार्चे गाउँपालिका १ हजार ८९३ रहेका जानकारी दिए ।

उनले गोरखामा स्वास्थ्य बिमा गराउनेमध्ये पुरुषको तुलनामा महिलाको संख्या बढी रहेको बताए । ‘स्वास्थ्य बिमा गराएकामध्ये ४२ हजार ११४ जना पुरुष रहेका छन्,’ उनले भने, ‘स्वास्थ्य बिमा गराउने महिलाको संख्या भने गोरखामा ४६ हजार ६०२ जना रहेको छ ।’ स्वास्थ्य बिमा गराएकामध्ये १ हजार ९३३ जना अतिगरीब घरपरिवार पहिचान भएका व्यक्तिको निःशुल्क बिमा गरिएको उनले जानकारी दिए ।

१५ हजार ९०४ जना ज्येष्ठ नागरिक, ५९८ जना ‘क’ वर्गका अपाङ्गता भएका व्यक्ति तथा ३४३ जना एचआईभी संक्रमित व्यक्तिको पनि निःशुल्क बिमा गरिएको उनले बताए । ५ परिवार भएका परिवारले १ वर्षको ३ हजार ५०० तिरेपछि १ वर्षसम्म तोकिएको अस्पतालबाट प्रतिव्यक्ति १ लाख बराबरको उपचार सेवा प्राप्त गर्ने प्रमुख लौडारीले जानकारी दिए ।

५ जनाभन्दा बढी सदस्य रहेका परिवारले थप १ व्यक्तिको ७०० रुपैयाँ थप गरेर बिमा गर्नसक्ने व्यवस्था रहेको उनले जानकारी दिए । गोरखा जिल्लामा बिमा गराएका व्यक्तिले गोरखा अस्पताल, आँपपीपल अस्पताल, मकैसिंह प्राथमिक स्वास्थ्य केन्द्र, जौवारी प्राथमिक स्वास्थ्य केन्द्र र आरुघाट प्राथमिक स्वास्थ्य केन्द्रबाट उपचार सेवा लिनसक्ने गरी स्वास्थ्य संस्था सूचीकृत रहेको प्रमुख लौडारीले बताए ।