प्रधानमन्त्री पुष्पकमल दाहाल ‘प्रचण्ड’ले लुम्बिनी क्षेत्रको विकासमा सरकारले विशेष चासो राखेको बताएका छन् ।

लुम्बिनीमा आयोजित २५६७‌ औं बुद्धजयन्ती तथा लुम्बिनी दिवसको अवसरमा बोल्दै प्रधानमन्त्री दाहालले बृहत्तर लुम्बिनीको विकासमा चासो दिएको बताएका हुन् । 

उनले लुम्बिनीसँगै कपिलवस्तु, देवदह, रामग्रामलाई समेटेर बृहत्तर लुम्बिनीको रुपमा विकास गरिने उल्लेख गर्दै तिलौराकोट पनि विश्व सम्पदा सूचीमा सूचीकृत हुने क्रममा रहेको बताए ।

प्रधानमन्त्रीले विश्वमा शान्तिको सन्देश फैलाउने लुम्बिनीको विकास सँगसँगै बौद्धमार्गीहरूको केन्द्र बनाउने बताए । 

क्रान्ति र शान्ति एक अर्काका पूरक भएको उल्लेख गर्दै प्रधानमन्त्री दाहालले यसलाई बुझ्ने र ग्रहण गर्नेमा एकरूपता हुन नसकेको बताए ।

कार्यक्रममा पर्यटन मन्त्री सुदन किरातीले बुद्धको जीवनबाट त्यागको सन्देश ग्रहण गर्नुपर्ने बताए । 

उनले लुम्बिनीलाई धार्मिक र सांस्कृतिक केन्द्रको रूपमा स्थापित गर्दै पर्यटक आगमनको केन्द्र बनाउने बताए । उनले गौतमबुद्ध अन्तर्राष्ट्रिय विमानस्थलमा आउने-जाने विमानलाई नियमित गरिने बताउँदै थप मुलुकमा उडान गर्ने तयारी भइरहेको बताए । 

लुम्बिनी प्रदेशका मुख्यमन्त्री डिल्लीबहादुर चौधरीले लुम्बिनी प्रदेशमा बुद्ध सर्किट बनाउने अवधारणा आए पनि अघि बढ्न नसकेकाले अघि बढाउनुपर्ने बताएका छन् ।