पश्चिम बंगालकी मुख्यमन्त्री ममता बनर्जी विपक्षी गठबन्धनको पक्षमा देखिएकी छन् । 

केन्द्र सरकारको नेतृत्वकर्ता दल भारतीय जनता पार्टी (भाजपा) लाई परास्त गर्न सबै विपक्षी दल एकजुट हुनुपर्ने मुख्यमन्त्री बनर्जीको राय छ । भाजपाबाट प्रधानमन्त्री नरेन्द्र मोदीले सरकार चलाइरहेका छन् ।

मुख्ष्मन्त्री ममताले चुनावी गठबन्धन गर्दा केही शर्त राखेकी छन् । कर्नाटक विधानसभा चुनावमा कांग्रेसले जितेपछि उनी विपक्षी गठबन्धनको पक्षमा स्पष्ट भएकी हुन् । सन् २०२४ मा हुने लोकसभा चुनावमा विपक्षी दलहरू मिलेर जानुपर्ने आवाज सुनिँदै आएको छ ।

मुख्यमन्त्री ममताले लोकसभा चुनावमा कर्नाटकमा कांग्रेसलाई सघाउन आफू तयार रहेको तर बंगालमा कांग्रेसले आफूलाई सघाउनुपर्ने शर्त राखेकी छन् । उनले जुन क्षेत्रमा जो दल बलियो छ, त्यो त्यसमा अन्य दलले बलियोलाई सघाउनुपर्ने मापदण्ड तय गरेकी छन् । उनले भनिन्, ‘कुनै खास क्षेत्रमा बलिया दलसँग मिलेर चुनाव लड्नुपर्छ । म कर्नाटकमा कांग्रेसलाई समर्थन गर्छु तर कांग्रेसले बंगालमा मेराविरुद्ध लड्नुभएन ।’

भारतीय सञ्चारमाध्यमका अनुसार कांग्रेसले आफूले मात्रै समर्थन बटुल्ने नभई अन्य दललाई पनि समर्थन गर्न सिक्नुपर्ने उनले बताइन् ।