उपराष्ट्रपति रामसहायप्रसाद यादवले राष्ट्रिय शहीद स्मारक सम्पन्न गर्नका लागि पहल गर्ने बताएका छन् ।

राष्ट्रिय शहीद स्मारकको १७औँ स्थापना दिवस कार्यक्रमलाई सम्बोधन गर्दै उनले गोकर्णेश्वर नगरपालिका–४ स्थित यज्ञडोल (जगडोल) सामुदायिक वन क्षेत्रमा निर्माणाधीन स्मारक सम्पन्न गर्नका लागि पहल गर्ने बताएका हुन् ।

मन्त्रिपरिषद्ले स्मारक निर्माण गर्ने निर्णय गरेको १७ वर्ष पूरा गरेको अवसरमा आयोजित कार्यक्रम उनले आफू वन तथा वातावरण मन्त्री हुँदा पनि काम रोकिएर अलपत्र बनेको स्मारकको काम अघि बढाउन सहयोग गरेको स्मरण गरेका थिए ।​

विसं २०६३ वैशाख ११ गते जनआन्दोलनको बलमा स्थापित संसद्ले परिवर्तनका लागि योगदान गर्ने शहीदका नाममा स्मारक बनाउने घोषणा गरेको उपराष्ट्रपति यादवले बताए ।

मुलुकका लागि शहादत हुने शहीदको नाममा निर्माण भइरहेको स्मारक पूरा गर्न सबैको योगदान हुनुपर्ने उल्लेख गर्दै त्यसमा आफूले पनि सघाउने उनको प्रतिवद्धता छ ।