प्रधानमन्त्री पुष्पकमल दाहाल ‘प्रचण्ड’ले भारत भ्रमणका बेला लिपुलेक, कालापानीलगायतका नेपाली भूमि फिर्ता लिनेबारे उपयुक्त तरिकाले छलफल गर्ने बताएका छन् ।

नेपालको सीमा सुरक्षाबारे आफूले भारत भ्रमणको क्रममा गम्भीरतापूर्वक छलफल गर्न ध्यान दिने प्रधानमन्त्री प्रचण्डले प्रतिबद्धता जनाए ।

शनिवार सांसदहरूले सोधेका स्पष्टीकरणबारे जवाफ दिने क्रममा उनले पञ्चेश्वर परियोजना अघि बढाउनेबारे नयाँ समझदारी हुने विश्वास समेत व्यक्त गरे । उनले आफ्नो भारत भ्रमणमा सार्क बैठकलाई सञ्चालन गर्ने विषयमा पनि छलफल गर्ने बताए ।

प्रधानमन्त्री प्रचण्डले भने, ‘सार्क बैठकको बारेमा छलफल चलिराखेको छ । यो विषयमा मेरो गम्भीर रूपले ध्यान छ । यी विषय उपयुक्त तरिकाले छलफलमा जान्छन् । पञ्चेश्वर परियोजना अघि बढाउनेबारे एउटा नयाँ समझदारी हुन्छ भन्ने मेरो विश्वास छ र निकै सकारात्मक ढंगले छलफल चलिराखेको छ ।’

प्रधानमन्त्री प्रचण्डले २ वर्षभित्र भूमि सम्बन्धी समस्या समाधान गर्ने आश्वासन पनि दिएका छन् ।