एनएमबि बैंक लिमिटेड र दराज नेपालबीच विनाधितो कर्जाका लागि सम्झौता भएको छ ।

सम्झौताअनुसार दराज नेपालका बिक्रेताहरूले विनाधितो विद्युतीय कर्जा प्राप्त गर्नेछन् ।​

विशेषगरी बैंकिङ पहुँच कम भएका, उत्पादनशील उद्यमसँग जोडिएका, स्टार्ट अप्स फर्म तथा कम्पनीहरूलाई दराजसँगको कारोबारको आधारमा रु. ५ लाखसम्मको चालू पुँजी कर्जा प्रदान गर्ने उद्देश्यअनुसार सम्झौता भएको एनएमबि बैंकले जनाएको छ ।

सम्झौतामा बैंकको तर्फबाट नायब प्रमुख कार्यकारी अधिकृत गोविन्द घिमिरे र दराज नेपालको तर्फबाट प्रबन्ध निर्देशक आँचल कुँवरले हस्ताक्षर रहेका छन् ।

सम्झौताको बारेमा बोल्दै बैंकका नायव प्रमुख कार्यकारी अधिकृत घिमिरेले अर्थतन्त्रको वास्तविक क्षेत्र तथा डिजिटलाईजेशलाई प्राथमिकता दिइरहेका र यस  कर्जामार्फत ग्राहकहरूले अनलाईनमार्फत आवेदन दिएको केही मिनेटभित्रै कर्जा उपलब्ध गराउने प्रविधिको विकास गरिएको बताए ।

यस कर्जामार्फत धेरै भन्दा धेरै एमएसएमई कर्जाका ग्राहकहरूको आवश्यक चालू पुँजी पूर्ति गर्ने बैंकले विश्वास लिएको उनको भनाइ थियो ।

एनएमबि बैंकले हाल देशभरि २०१ शाखा, १३८ एटीएम र १२ एक्स्टेन्सन काउन्टरमार्फत उच्चस्तरीय सेवा प्रदान गर्दै आइरहेको छ ।