तनहुँको व्यास नगरपालिकाले यात्रुबाहक बसमा अनिवार्य ‘डस्टबिन’को व्यवस्था मिलाउन यातायात समितिलाई पत्राचार गरेको छ ।

व्यास नगरलाई सफा र स्वच्छ बनाउने उद्देश्यसहित जथाभावी फोहोर फाल्ने कार्यलाई न्यूनीकरण गर्न यात्रुबाहक बसमा ‘डस्टबिन’को व्यवस्था मिलाउन पत्राचार गरेको हो । 

जथाभावी रूपमा फोहर फालिदिँदा नगरपालिका दुर्गन्धित हुने भएकाले सवारीसाधनमा अनिवार्य ‘डस्टबिन’को व्यवस्थापनका लागि निर्देशनसहित पत्राचार गरिएको प्रमुख प्रशासकीय अधिकृत गंगालाल सुवेदीले जानकारी दिए । उनले भने, ‘नगरपालिकालाई वातावरणमैत्री शहर बनाउन नगर क्षेत्रभित्र गुड्ने सवारीसाधनमा अनिवार्य डस्टबिन राख्न भनेका छौं ।’

सवारीसाधनमा यात्रा गर्ने यात्रुलाई पनि जथाभावीरूपमा फोहर नफाल्न यातायात समितिमार्फत जानकारी गराउन निर्देशन दिइएको उनले बताए । जथाभावीरूपमा अटेर गरी फोहर फालेमा पहिलोपटक ३ हजार र दोस्रोपटक ७ हजारसम्म जरिवाना गरिने उनले जानकारी दिए ।

नगरपालिकाले पृथ्वी राजमार्ग यातायात समिति, स्थानीय यातायात प्रालि, व्यासभूमि यातायात प्रालि, ट्याक्सी व्यवसायी समिति र अटो रिक्सा व्यवसायी समितिलाई पत्राचार गरेको हो । नगरपालिकाले बजारका विभिन्न क्षेत्रमा फोहरमैला व्यवस्थापन सम्बन्धी सचेतनामूलक बोर्ड राखेको छ । नगरपालिकाका सरसफाइ शाखाका प्रमुख भाग्यशाली ढुंगानाका अनुसार बजारका मुख्य–मुख्य भागमा जथाभावी फोहोर नफालौं, फोहोर फालेमा हुने कानूनी कारबाही लगायतका विषयमा सचेतना दिन सचेतनामूलक बोर्ड राखिएको छ ।

व्यास नगर फोहोरमैला व्यवस्थापन कार्यविधि २०७८ अनुसार दफा १४(क) नगरपालिका वा सम्बन्धित वडाले तोकिएको समय र स्थानबाहेक अन्यत्र फोहोरमैला निष्काशन गरी यत्रतत्र राखेमा वा फालेमा सोही कार्यविधिको दफा १९ अनुसार कसूर गर्ने व्यक्तिलाई जरिवाना गरिने उनले बताए ।

त्यस्ता व्यक्तिलाई पहिलोपटक ३ हजार जरिवाना, दोस्रोपटक सोही कसूर गरेमा ३ हजारदेखि ७ हजारसम्म जरिवाना र फोहोरमैला उठाउँदा लाग्ने खर्च समेत निजबाट असूलउपर गरिने जनाइएको छ ।