काठमाडौँ । अविरल वर्षापछिको बाढी पहिरोका कारण पूर्वी नेपालको विभिन्न स्थानमा जनधनको क्षति भएको छ ।     प्रहरी प्रधान कार्यालयका अनुसार पाँचथरको फालेलुङ गाउँपालिका-३ खोलाघारीस्थित गएराति पहिरो जाँदा एक जनाको मृत्यु भएको छ ।  पहिरोमा परी सोही गाउँपालिका-४ मेमेङ घर भएका प्रदिप साउदेनकी छोरी ८ वर्षीया जुना साउदेनको मृत्यु भएको हो ।

 पहिरोमा परेर गम्भीर घाइते भएकी उनको जिल्ला अस्पताल पाँचथरमा उपचारको क्रममा मृत्यु भएको हो । साथै पहिरोले फालेलुङ गाउँपालिका-३ खोलाघारी बस्ने ६८ वर्षीय मन प्रसाद राईको घरमा परिएर अन्नपात, लत्ताकपडा, भाँडाबर्तन पूर्णरुपमा क्षति भएको छ ।  

इलामको फाकफोकथुम गाउँपालिका-१ पतेवास्थित आमचोक-पंचमी भित्री सडक खण्डमा पनि गएराति आएको अविरल वर्षाको कारण पहिरो जाँदा सडक अवरुद्ध भएको छ ।

यसैगरी ईलामकै माङसेबुङ गाउँपालिका-२ पावास्थित गजुरमुखी-दमक भित्री सडक-खण्डमा अविरल वर्षाका कारण गएराति पहिरो जाँदा सडक अवरुद्ध भएको छ ।

यसैगरी ताप्लेजुङको सिरीजंघा गाउँपालिका-१ सिनाम हैरङ्गे र सोसुङ्वास्थित तेल्लोक थर्पु सडक-खण्ड, पाथिभरा याङबरक गाउँपालिका-१ सेसम्बुस्थित उत्तर-मेची राजमार्ग, आठराई त्रिबेणी गाउँपालिका-१ मालबासेस्थित भित्री सडक-खण्ड, मेरिङ्देन गाउँपालिका-३ मैवाखोलास्थित दोभान ढुङ्गेसाँघु सडकखण्ड पनि अविरल वर्षाका कारण अबरुद्ध भएको छ । यसैगरी सिदिङ्वा गाउँपालिका-४ स्थित पाँचथर ताप्लेजुङ जोड्ने ईन्द्रावती खोलास्थित ताप्लेजुङतर्फको पुलको साईडको सडक बाढीले बगाएको छ । 
 साथै मैवाखोला गाउँपालिका-३ र ४ जोड्ने ताम्राङ खोलास्थित पक्की पुल बगाएको छ भने झोलुङ्गे पुल बाढीले लतारी कोल्टे परेको छ ।

यसैगरी ताप्लेजुङको सिरीजंघा गाउँपालिका-३ स्थित अस्थाई प्रहरी चौकी काँडेभन्ज्याङको कम्पाउण्ड वाल करिब  ५ मिटर आइतबार बिहान पहिरो जाँदा कार्यालय भवन जोखिममा परेको छ । सिदिङ्वा गाउँपालिका-६ मेहेलेमा समेत पहिरो जाँदा स्वास्थ्य चौकी भवन पूर्ण रुपमा क्षति भएको छ ।

यसैगरी संखुवासभाको चैनपुर नगरपालिका-११ कावा खोलामा गएराति आएको बाढीको कारण चैनपुर नगरपालिका-११ लुहाकोट बिजुवा सामुदायिक लिफ्ट खानेपानी आयोजना अन्तर्गत सभाखोलाबाट मोटर पम्प, मोटर ट्रान्सफर्मर, १ वटा भवन  र सोही ठाउँ बस्ने रेल बहादुर राई समेत ८ जनाको खेत बाली बगाएको छ । 

साथै  सोही बाढीले ५ जनाको घर तथा गोठ र खाँदबारी नगरपालिका-९ सभाखोला पुल छेउमा रहेको १ वटा टिपरसमेत बगाई आधार पुरिएको अवस्थामा फेला परेको छ । 
यसैगरी संखुवासभाको पाँचखपन नगरपालिका-८ दोभानेस्थित हेवा खोलामा बाढी आउँदा सोही ठाउँ बस्ने सुर्य बहादुर न्यौपाने, धन कुमारी सुवेदी, अर्जुन कुमार कार्की समेतको घरमा क्षति पुगेको छ । 

 हेवा खोलामा निमार्णाधिन पक्की पुलको निर्माण सामग्रीहरु बाढीले बगाउँदा करिब १ करोड ५० लाख रुपैयाँ मूल्य बराबरको धनमाल क्षति भएको छ । 

बाढी पहिरो गएको स्थानमा नजिकको प्रहरी कार्यालयबाट खटिएको प्रहरीले आवश्यक उद्दार कार्य तथा अनुसन्धान गरिरहेको छ ।