प्रेमीको कुरा काटेको निहुँमा युवतीहरूबीच ‘ग्याङ फाइट’

गत शुक्रवार सुनसरीको बराहक्षेत्रमा ५ जना युवतीको समूहले ३ जना युवतीमाथि गरेको कुटपिट योजनाबद्ध रहेको खुलेको छ ।

युवतीको एक समूहले अर्काे समूहमाथि निर्घात कुटपिट गर्दै ग्याङ फाइट भएको थियो । फोन गरेर नै बोलाएर कुटपिट गरिएको प्रहरीले जनाएको छ ।

प्रेमीको कुरा काटेको निहुँमा सुनसरीको बराहक्षेत्रमा युवतीको एक समूहले अर्काे समूहमाथि निर्घात कुटपिट गरेको हो । ५ जनाले ३ जना युवतीलाई सप्तकोशीको किनारमा निर्घात कुटपिट गरेका हुन् । कुटपिटमा संलग्न भएको आरोपमा प्रहरीले बराह क्षेत्र नगरपालिका–९ की १९ वर्षीया कृति लिम्बुलाई पक्राउ गरेको छ ।

उनलाई अभद्र व्यवहार मुद्दामा अनुसन्धानका लागि हिरासतमा राख्न जिल्ला अदालतबाट अनुमति लिएको सुनसरीका प्रहरी प्रवक्ता डीएसपी राजकुमार राईले जानकारी दिए ।

सुनसरीको बराहक्षेत्र–९ को राजाबास (कोशी किनार) मा शुक्रवार कृतिसहित ५ जनाको टोलीले अन्य ३ जना युवतीलाई बोलाएर निर्घात कुटपिट गरेका थिए । कुटपिटको भिडियो सामाजिक सञ्जालमा सार्वजनिक भएको छ ।

‘प्रेमीको विषयमा कुरा काटेको निहुँमा कुटपिट गरेको देखिन्छ,’ प्रहरी नायव उपरीक्षक राईले भने, ‘एक जना पक्राउ परेकी छन्, ४ जनाको खोजी गर्दैछौं, थप विषयमा अनुसन्धान हुँदैछ ।’

कुटपिटको भिडियोमा आफ्नो कुरा किन भनेको भन्दै मुक्का र लात्ती हानेको देखिन्छ । प्रहरीका अनुसार कुटिने र कुटाइ खानेहरू चिनजानकै व्यक्ति हुन् ।

‘कुटाइ खाने र कुट्ने चिनजानेका साथी हुन्, कुट्ने समूहले निगार (घरेलु मदिरा) खाएर कुटेको देखिन्छ,’ प्रहरी स्रोतले भन्यो, ‘काम छ भन्दै कोशी किनारमा बोलाएर कुटपिट गरेका रहेछन् ।’